Dass es emol eso wyt chunnt, hät niemer dänkt. Glyy es Johr ischs här. S Hutzgüri isch grad zrugg cho vom Rundgang und het sich s Laubnäscht bequem gmacht. Do chunnt die Mäldig vo Bärn: Alles, wo meh Lüt binenander stönde, darf nümm syy. D Hutzgüritruppe isch verschrocke. Sie häi zerscht dänkt, es sygi wägen ihne. Sie hebe am Dunschtigzobe so wild do, ass der Bundesrot verwache isch. Aber näi, das isch s nit gsi. Der Grund isch es ganz, ganz chläises Tierli. E Virus, wo usser Kontrolle grooten isch.

Im erschte Momänt het se das beruhigt. Si häi aagnoo, dä Virus wird der Wäg in d Tüüfelschuchi nie finde, und bis s Hutzgüri wider ins Dorf well, syg dä scho lengschtens ussgstorbe. Zuedäm sy si guet vorbereitet. Si sorge jo vor. Näme regelmeessig hochprozäntigi Schluckimpfige, Pfote wäsche sy, wenns nötig isch, und dank däm Dräck, wo si in ihrem Läbe scho gässe häi, häi si gnue Abwehrchräft in sich inne. S Hutzgüri sälber jo sicher au.

Die Yyschetzig het düscht. Dä Virus isch immer no umme. Der Veehdokter het letschti bim Kantonstierarzt müessen aadraabe. Dä het im ins Gwüsse gredt und gsäit, ass er in erschter Linie für s Hutzgüri verantwortlig isch. Au für ihns gälte alli Massnahme. In sym Alter ghörts zu der Risikogruppe, drum muess me ihns bsunders schütze. Vonere Impfig wurd er zwar no abrote. Tescht si noni alli gmacht, d Näbewürkige an Hutzgüri noni bekannt.

«Jä was heisst das? Dörfe mir jetz nümm ins Dorf?», häi d Äierwyybli gfrogt. «Und was isch mit em Bott?» Do wäiss me jo nie, wo dä umefagantet uf all syne Botegäng. Es häisst, är heb Liebschafte bis ins Elsass. Darf dä no zuenys cho? Bim Schärmuuser ischs weniger gföhrlig. Usser mit syne Müüs het dä mit niemerem Kontakt. Aber d Hauptsach, s Hutzgüri, was isch mit ihm?

Ins chöne mir jo nit äifach zwöi Johr lo ligge. Das verhungeret ys no in dere Zyt. S isch durenander diskutiert worde. D Äierwyybli häi gstürmt: «Grad das Johr wäi mir uf d Pischte. Dir häit eus doch versproche, zum Jubiläum vom Frauestimmrächt dörfe mir d Opfer ussueche. Mir häi scho 7 hübschi, jungi Burschte uf dr Lischte. Mir müesse ins Dorf! Us zwee alte Schürz schnurpfe mir em Hutzgüri e Maske. Im Schärmuuser chnüpfe mir e längers Seil, dass är der Abstand cha yhalte. Der Veehdokter muess chly wyter hindedryy laufe und der Bott darf hüür halt nit mit. So gohts doch.»

«Halt, halt, halt!» Der Veehdokter chlopft uf e Tisch. «Fertig gstürmt. Alli andere müesse vo dehäi us schaffe, chöne nit in d Beiz, dörfe sich nit träffe und müessen überall Maske träge. Drum blybt au s Hützgüri dehäi. I verfüeg ab sofort 10 Tag Quarantäne. Us Solidariteet. Mir müesse halt luege, wie mer s Hutzgüri über d Rundi bringe und der Gürtel änger schnalle. Aber das müessen alli anderen au. Dorum:

Hutzgüri geeri, Suurchrut mit Beeri,
Läider läider ischs eso: S Hutzgüri wird hüür nit cho.
Das, wo dir häit welle geh, wärde mir eus nögscht Johr neh.
S wärde käini Chatze gstreckt und au nit es Huus abdeckt. Hutzgüri, schütz du dii!» Der Schärmuuser