Und denn die Angscht, ass plötzlig zum Schueligs-Zwäck wirsch. Eifach wil di komisch aagstellt hesch bim Delifoon-Gsprööch mit der Bank. «Dieses Gespräch wird zu Schulungszwecken aufgezeichnet.»

Das heissts jo ammen am Aafang. Und i weiss jo nit, wies euch goht, aber für mi bedütet das Stress. Das isch Druck, wo do ufbout wird. Und unter Stress die richtige Wort finde, die richtigen Entscheidige träffe, sich wiene normale Mensch verhalte – das isch nit so eifach. Das gseht me jo überall. Wenn mir Mensche Stress häi oder Angscht, denn fömmer gärn mol afo spinne – im Affekt stelle mer Züg aa, wo nocher für alli unagnähm isch. Do müese konstant Suppen usglöfflet wärde. Literwys Suppe.

I ha aso mit der Bank delifoniert. Wäg Brobleem mit em E-Banking. Und das Gsprööch isch zu Schueligs-Zwäck ufzeichnet worde. Und i ha mer denn sone Hörsaal vorgstellt. E riiise Hörsaal, voll mit junge Fachlüt. Und unde, vor der Daafele, stoht e Dozäntin, wo grinnst und säit: «So liebi Lüt, mir starten eusi Schuelig mit öbbis Luschtigem. Lose Si mol.» Und denn druckt si uf e rote Play Chnopf vo some Kasetterekorder us den 1980er-Johr – und 200 Lernendi grööle los, wil der Muheim bi däm Gsprööch richtig vergee het. Und zwar scho bi den erschte Sicherheits-Frooge.

Apropos Sicherheits-Frooge: Do fühlsch di jo ammen au bitz, wie bi de mündlichen Abschlussprüefige. Wil wenn d Berootere vo der Bank säit: «Erschti Sicheheitsfroog: Wie vill Konte häi Si bi eus?» Merksch vellicht, ass die verschiidene Kontene gar nie bewusst zellt hesch. Muesch aso schätze. Scho bi der erschte Froog!

Und denn säisch: «Aso. Em. Föif.» Und d Berootere säit nüt. Und du säisch: «Stimmt scho, gälle Si?» Und si säit: «Das chan i Ihnen erscht am Schluss säge – nöggschti Froog …» Und du frogsch di sälber: «Ab wie viil falsch beantwortete Sicherheits-Frooge landet men eigentlig in der Chischte? Und vor allem: Was dänke d Lüt im Höörsaal über mi, wo das loose?»

Uf jede Fall bin i bemerkenswärt unelegant dur das Gsprööch mit der Bank gstolperet. Am Schluss isch klar gsi, ass i muess handle. Grad bevor d Berootere het chönnen abhänke, hani gsäit: «Warte Si! Ville Dank für Ihri Berootig. Aber i weer sehr froh, wenn das Gsprööch nit in d Höörsääl use goht.»

«Was?» het si gfrogt. «Luege Si», hani gsäit, «d Menschheit het scho vill Schämmer botten im Verlauf vo der Zyt. Und all die Schämmer sy immer uf irgend en Art ufzeichnet worde. Au zu Schueligs-Zwäck, cha me säge. Nur häi die Schuelige nit vill brocht. D Menschheit het trotzdäm immer wiider die glyche Fehler gmacht. Aso, was i will säge, isch: I weer froh, wenn Si das Gsprööch nid für Schueligszwäck würde bruuche.»

Churz isch still gsi uf der andere Syte.
Denn het si gsäit: «Kei Brobleem … Adjö». Wiider mol die eigeni Ehr grettet. E Glück, ass niemer vo däm Gsprööch erfahrt.

Dominik Muheim ist in Reigoldswil aufgewachsen und lebt in Liestal. Er ist freischaffender Kabarettist und Slam-Poet. Er gewann 2017 den Baselbieter Kulturpreis und war 2024 Träger des «Salzburger Stiers».