Tatsächlig! Es git Usdrügg, wo my Wortschatz erwytere, no bevor i s sälber gmerggt ha. Immer wiider überrasch ich mi mit neue Wörtli. Guet, ganz neu sin die Wörter natürlig nit. Im Gägeteil. Mir kenne si alli. Neu isch numme, ass ich se tatsächlig plötzlig allbot verwänd. Tatsächlig? Das isch tatsächlig eins vo däne Wörter, wo mer schnäller über d Lippe rutscht, as i dängge ka. Und wenn i so ummeloos und ummeliis, gohts andere genau glyych. Das unschyynbare Modewort het tatsächlig Hochkonjunktur.

Tatsächlig han ich eigentlig nüt gäge das Wort. Es duet niemertem weh und richtet tatsächlig au niene e Schaden aa. Aber i frog mi halt glyych, wie sich das Wörtli unter mym Radar duren in my Sproochschatz yynegschlänglet het. So, wie kürzlig die Blindschlyychen in Garte vo der Frau Noochber. Zum Glügg isch si ungiftig und harmlos gsi, also d Blindschlyyche. Blindschlyychen im Garten sin übrigens super. Si jage schädlige Schnägge hindenoo, zum si z frässe. Und si logge Vögel aa, zum sälber gfrässe z wärde. Das isch natürlig brutal. Und brutal natürlig.

Aber wie gsäit: Giftig sin si nit. Wenn scho, isch d Noochbere giftig mit ihrer Pestizidsprützi. Dangg ihre toxische Gütterli seht alles blitzblangg suuber us in ihrem Steigarte. Aber tatsächlig sin au Steigärte toxisch, z.B. im Hiibligg uff d Artevyylfalt und d Gartevyylfalt.

Wobyy, au Blueme könne toxisch syy. Oder Lääbesmittel. Oder Papageie. Goldfisch. E-Bikes. Hahnewasser. Und und und. Plötzlig isch überall alles toxisch. Der Kontaggt zwüsche de Generationen isch toxisch. D Liebi zwüsche Maa und Frau isch toxisch. Und jetz han i gläse, ass eventuell sogar ich für mii sälber soll toxisch sy. Sidder halt i vorsichtshalber immer e weneli Abschtand zu mir. Aber seggs wie s well, uff jede Fall isch das neue Modewörtli toxisch für s Wörtli «giftig». Aber kei Angscht! Gift blybt Gift, ob toxisch oder nit.

Und jetz kumm ich ändlig zum Deal. Dä neudütsch USA-«Deal» isch grad hoch im Kurs. Är wird täglig ins Universum uuse trumpetet. It’s Business, stupid! E suubere Deal verbesseret d Wält. E Deal macht us Mensche Partner. E Deal definiert präzis, woraa de bisch. Was gisch. Was hesch. In der Wirtschaft. In der Politik. In der Liebi. Überall. E Deal isch e Deal isch e Deal. Kurz. Klar. Genial. Per Vertrag vertrag ich mi mit der Gägepartei. Alles super. Alles easy. Nöggschte Deal.

No Frooge?

Jä! Zem Byschpiil: Wieso dängg i bim e Deal immer grad an e Dealer. Dealer? Tönt kriminell. Und isch e Dealmaker bi uns nit e Gschäftlimacher? Tönt au nit sehr aamächelig. Und wo erledigt der Maker sy Gschäft? Uff em Hüüsli dängg. Dört, wo mir die suubere Kachle my verkachleti Exischtänz wiiderschpiegle. Derno wird gspüelt. Deggel zue und tschüss. So hinterlosst au der süüberscht Deal bi mir non e zimmli toxischi Duftnote. Tatsächlig.

Aernschd Born wohnt in Reinach. Er ist Songpoet, Autor und Kulturschaffender.