Wanderlieder hützutags

S isch noni lang här, han i für e Chor-Projäggt Wanderlieder gsammlet. Ich ha mi also uff d Suechi gmacht noch mögligscht vyyl Lieder, wo me bim Wandere so singt. In Mundart und uff Hochdütsch. Derby isch mir Zweierlei uffgfalle.

Als Erschts han ich mi gwunderet, wie vyyl vo däne Lieder ich noni kennt ha. Bis anhin han i dänggt, ich syyg in Sache Wanderlieder guet bewanderet. Schliesslig han i früehner bim Wandere ändlos Wanderlied um Wanderlied gsunge. Als Pfadi. Mit der Gitarre vor em Buuch.

Als Zweits han i aafoh noochehirne, wenn i eigentlig s letscht Mol e Wandergruppen aatroffe ha, wo bim Wandere singt. Ich dängg jetz nit an die, wo noch em e füechtfröhlige Dorffescht bim Hei-Torggle kollektiv in d Nacht uuse grööle. Ich red vo Mensche, wo nüechtern gmeinsam singen und glyychzytig dur die freyi Natur streife, zum Körper und Geischt z erfrüsche. Ich ka mi nümm erinnere. Uff jede Fall sin s Ewigkeite här. Gits eso singendi Wander-Gruppe überhaupt no hützutags?

Guet. Villicht bin ich eifach sälber z wenig uff Wanderschaft. Villicht befind i mi eifach nit uff em rächte Wäg. Drum triff ich wohrschyynlig au kuum Kängurus aa, wo an mir verbyyhopse. Falsche Zytpunggt. Falschen Ort. Sälber sing i jo au nümm bim Wandere. Ich bi scho froh, wenn i bim Spaziere noochekumm mit Schnuufe.

Lut em «Verband Schweizerischer Wanderwege» gits in der Schwyz über 65 000 Kilometer offizielli Wanderwäg. Das sin meh als einehalb Mol der Ärdumfang. Ich ka also theoretisch der Globus umkreise, ohni ass i d Schwyz au nummen ei einzig Mol mues verloo. Do jublet doch mi patriotisch Wanderhärz. Bin ere zügige Wandergschwindigkeit vo vierehalb Stundekilometer und acht Stunde laufe pro Dag, schaff ich die Streggi logger in fünf Johr.

Zuesätzlig zu däne Wanderwäg gits jetz aber no, über e Duume peilt, öbbe 500 Wanderlieder, wo unterwägs wän gsunge wärde. Son e Wandersong duurt durchschnittlig gschätzti vier Minute. Bi acht Stunde singen und laufen am Dag, hesch das Repertoire in guet vier Däg gschafft. Wenn das 65 000 Kilometer lang machsch, hesch am Änd die ganz Liedersammlig 360 Mol duuregsunge. Derno kasch e jedes Wanderlied uswändig. Garantiert. Aber ebbe. Was nützts? Me singt jo nümm bim Wandere hützutags. Kei Luscht!

Au die junge Damen und Herre singe nümm, wenn si di wie hüpfendi Kängurus bim Spaziere überhole. Si maches vyyl gscheiter. Si löhn lo singe. In ihren Ohre-Stöpsel lauft der perfäggti Sound-Track zur Landschaft online.

Ich lehr gärn vo de Junge. Ich läb jo schliesslig nit hinter em Mond. Jetz leitet mi my neu Händy zu myne Wanderwäg und misst grad au no Müllers Luscht bim Wandere. My Luscht isch hütte riisig. Ich ha mir über d Nacht 500 Wanderlieder aabeglade, gsunge vo der Taylor Swift.

E glayne Schritt für e Spaziergänger. E grosse Schritt für d Menschheit.

Aernschd Born wohnt in Reinach. Er ist Songpoet, Autor und Kulturschaffender.