Chumm schänk mer nomol yy

Geschter bin I im Eberain yyglade gsi, as Mitgliid vo der Jury derby z hälfe, d Staatswyy vo de beide Basel z küre. Mit der Yyladig het me my au gfroggt, öbb I am Schluss non e paar Wort chönn sääge zu mym eigene Verhältnis zum Wyy. Do han I zur Vorbereitig natürlig echly müesse grüüble, was I denn eigetlig im Läben überhaupt je as Erschts vom Wyy ghört ha? Und no isch mer das alte Familiegschichtli wiider in Sinn cho:

Lang vor myner Geburt het my Groossvatter z Fränkerderf am Eggrain e paar eigeni Räbstöck gha, won er mit vill Liebi ghegt und pflägt het. Der Ertrag isch bescheide gsi, numme grad ei Fässli Wysse pro Joor, und e suure Cheib sygs gsi. Aber der Groossvatter heeb en über alles gärn gha, sy eigene Wyy! Mueter und Unggle häi verzellt, wie si ihn as Chinder heimlig beobachtet heebe, won er amme wie magisch aazooge zu sym Fässli in Chäller aabegschliche syg. No heeb er e groosses Glas zapft und in eim Zug leertrunken und denn grad no eis. Und derzue tatsächlig mit sym Wyy gschwätzt: «O du Deufel, aber was chan I denn au derfür, I ha dy halt eso gärn!» Denn heeb er mit glasigen Auge non e paar Lumpeliedli gsungen und hindedry sys Rüschli selig uf em Gartebänkli usgschloofe.

Wil mer das grad as Erschts yygfallen isch, ha mer gsäit: «Nei, besser, I verzicht uf en Aasprooch bi dere Staatswyykürig und sing derfür lieber e Lied. Und zwar muess I e Wyy- und Trinklied mache, so eis im alte Ländlerstil, wies der Groossvatter aagheiteret uf em Bänkli au gärn gsunge hätt!» Und no isch das do derby uusecho:

Chumm schänk mer nomol yy

I ha die ganzi Wält scho gsee und bi wyt ummecho
Ha gliebt und gläbt und niene nie kei volls Glas je lo stoo
Drum weiss I hüten eis genau und schwör druf Stei und Bei
Nei, niene isch e Wyy so guet, wie dä vo do dehei

Refrain:
Drum hoppla Schorsch und eis, zweu, drüü chumm schänk mer nomol yy
Das Läben isch so gly verby und z churz für schlächte Wyy
Drum hoppla Schorsch und eis, zweu, drüü hüt lömmer d Sorge sy
Drum chumm und schänk mer nomol yy schänk yy vom eigne Wyy

Und mit em Glas denn in der Hand, do mach I d Auge zue
No stoot d Wält still für ei Momänt und s isch e Seelerueh
I trink und ha bi jedem Schluck e sone Wööli drab
As brünzli mir en Ängeli vom Himmel d Gurglen ab

Refrain

Florian Schneider wurde 1959 geboren und stammt aus Reigoldswil. Er ist Sänger, Schauspieler und Liederschreiber und lebt mit Tochter Mina in Eptingen.

MUNDART

Image Title

Möchten Sie weiterlesen?

Ja. Ich bin Abonnent.

Ja. Ich benötige ein Abo.

Article

Image Title