Laubblööser

Der ganz Morge het der Abwart mit däm luute, näärvige Laubblööser Bletter vom Parkplatz ewägg bloost. Vo linggs nach rächts und irgendwenn het er äntlig zwee groossi Hüffe Laub gha. Nid ass ich öppis gege dä Abwart hätt, e nätte Maa isch das gsi. (Nid sone Chnulleri, wo in jedem Stock der Lift butzt.) Aber ich find Laubblööser halt äifach doof.

Das isch vor villne Joor im Block passiert, won ich die erschti Zyt do z Bayern gwohnt ha. Der Abwart het dört der ganz Daag gruumt und gmacht und doo. Er het Strüücher gschnitte, s Abfallhüüsli kontrolliert, im Herbscht isch er denn ebe jeede Daag dene Bletter hindedryygsecklet, sobald die am Boode glääge sy.

Ich ha däm Schauspiil sällmol lang zuegluegt und das Prinzip denn scho nid ganz verstande. Vor allem, wenn me s Laub numme vo äim in ander Egge bloost. Das chunnt mir vor wie sone Probleem-Verschiebig. Wie wenn ich die noni zahlte Rächnige vom Chuchi- uf e Stuubetisch legg. Oder s dräckige Gschiir vo der äinten uf die ander Ablaag stell. Oder der Chläiderhuffe vom Bad uf e «Das legg i irgendwenn nomol aa»- Stuehl im Schloofzimmer ghei. Es räins Probleem-Verlaagere. Wie so Lüt, wo immer meh Kommode chaufe statt mol uusmischte.

Ich find jo Laub an sich öppis Tolls. In mym jetzige Gärtli lyt e Huffen umme, und nid numme d Igel freue sich. Myni Noochbere schimpfen ammen e chly, denn stelle Sii sich vor: D Bletter vo eusne Bäum wüsse partout nid, wo der Gaartehaag duure goht und seegle denn äifach näbedraa ufs schön gmachte Rabättli.

Denn wirblets do amme vo der ganze Strooss d Bletter ummenand. Denn ligge vor em Huus Ahornbletter und Fichtenoodlen umme, obwohl ich settig Bäum gar nid ha. Ich stell mir denn amme vor, wenn sich eusi Probleem au so würde verschiebe. Die hööchi Heizchoschterächnig vom äinte Noochber flatteret zum andere, und d Prüefigsangscht vom Teenie beschäftigt plötzlig die näbedraa. Denn doch lieber s Laub!

Sällen Abwart het also a däm Morge die groosse Bletterhüffe gmacht und schüst in däm Momänt, wo der ganz Parkplatz komplett leer gsi isch, isch e Helikopter cho z fliege! Im Block näbedraa isch en Arztpraxis gsi und die häi e Patiänt lo abhoole. Dä ADAC-Heli isch also genau vor eusem Huus cho lande, und uf äi Tätsch sy alli Bletter wiider verteilt gsi! Und no vill meh, wil dä notüürlig no der Räscht vo de Bäum aabe grüttlet het. Die plötzlige Probleem, wo wiider do liggen und dä Terminator-Abwart, wo hässig dernäbe gstanden isch: es tragisch-luschtigs Schauspiil.

Mit deenen Erinnerige gang ich jetz go Chläider wäggruume, das find ich effiziänter as de Bletter dusse noocherenne. E paar Probleem lööse sich jo amme doch von elläi.

Marianne Lindner-Köhler, 1981 im Baselbiet geboren und aufgewachsen, lebt mit ihrer Familie in München. Als Mary Long tritt sie auf bayerischen und Schweizer Poetry-Slam- und Kleinkunstbühnen auf.

MUNDART

Image Title

Möchten Sie weiterlesen?

Ja. Ich bin Abonnent.

Ja. Ich benötige ein Abo.

Article

Image Title