Vo Buus und Boozers

Nummen über en einzigs Wort verchnüpfe sich amme ganz unterschiidligi Sache mitenand, me chönnts nit besser erfinde! Vo myner Kollegin Kirsten us Miami han I an deer Stell jo scho im Mai verzellt. Und mit ihre fot jetz au die Gschicht wiider a:

Also, dä Juni sitz I grad in Bordeaux im Gärtli vom Hotel, do lütet d Kirsten aa, öbb I ihre bitte dringend e Gfalle chönni tue? Ihri Fründ Mr. und Mrs. Boozer syge nämmlig uf ihrer Schwyzerreis in Interlake gstrandet. D Mrs. Boozer heb uf ere Wanderig s Bei brochen und müess im Ligge nach Kloten uf e Rückflug. Aber s Hotel verlang fascht tuusig Stutz für dä Transport und öbb I villicht Zyt heeb, die beide z fahre? «Hejo», sääg I, «dyni Fründ sy au myni Fründ! I organisier das vo do us und gib der gly Bscheid.»

S längt ei Telifoon mit myner liebe Chauffeuse Frä Kuchen us Buus und sii übernimmt dä Uftraag. Mir machen ab, sii hol mit mym Auti am andere Tag die Boozers z Interlaken ab und fahr sen uf Klote. Uf d Pfrä Kuchen isch Verlass, die het Pfuus und s Probleem isch glöst. D Kirsten z Miami isch erlyychteret und s Boozers erscht rächt.

Zäh Minute spööter lütet s Handy im Hotelgärtli scho wiider. Dasmol isch d Gmeinipresidäntin vo Buus dra und froggt, öbb I bi ihne z Buus en 1.-Auguscht-Aasprooch chiem cho halte? «Jo gärn, dasch mer en Ehr», sääg I, «I bi denn zwar vorhär scho z Lieschtel as Feschtredner dra, aber das bringe mer aane. Also bis gly!»

Drei Tag spöter bin I us de Ferie zrugg und d Pfrä Kuchen holt mi uf em Flugplatz ab. Underwägs verzellt sii mer vo däm Chranketransport uf Klote. Ganz nätti Lüt syge das und bsunders luschtig syg gsi, dass s Boozers gfroggt heebe, wo sii denn wohni. Wo sii gsäit heeb, sii chömm vo Buus, heebe die beide müesse lache, nei, das syg jetz aber e Zuefall! Wil wäge Buus im Kanton Baselland syge sii jo überhaupt in d Schwyz cho. Vo Buus stammi nämmlig der Name vo ihrem Vorfaar Ulrich Buser, wo vor fascht dreihundert Joor uf Amerika usgwanderet syg. Ihre Name Boozer chömm vo Buser und drum syge sii jo au z Buus uf Bsuech gsi und e Buusner Gmeinrot heeb ihne s ganze Dorf zeigt.

Zobe liis I dehei no die neui «Volksstimm». Und jetz lueg au do, scho uf der Titelsyten en Artikel «Back to the roots. Die Boozers in Buus. Amerikaner besuchen die alte Heimat!» samt Föteli uf der Farnsburg. «Wie das allbott efang ständig buuselet, s isch meini nümm normal!» dänk I no und d Kirsten schrybt us Miami: «What a small world!»

Das mit der 1.-Auguscht-Aasprooch z Buus in der Turnhalle het denn übrigens klappt. Und hindedry bin e paar Fläsche Kerner Buusner Staatswyy vom Hof Leime verzell I im Buusner Gmeinrot natürlig die buuslaschtigi Anekdote vom Juni. Do lache mer und stoosse zümftig aa und no dis no im Lauf vom Oobe macht mi dä göttligi Wyssi grad au no sälber zum ne «Boozer»: Das heisst übersetzt nämmlig nüt anders as «Schluckspächt»!

In däm Sinn und Geischt: Proscht Buus!

Florian Schneider wurde 1959 geboren und stammt aus Reigoldswil. Er ist Sänger, Schauspieler und Liederschreiber und lebt mit Tochter Mina in Eptingen.

MUNDART

Image Title

Möchten Sie weiterlesen?

Ja. Ich bin Abonnent.

Ja. Ich benötige ein Abo.

Article

Image Title