«Nochweeh?»

Zum Artikel «Esaf wird wohl deutlich teurer» in der «Volksstimme» vom 22. November, Seite 10

I weiss fascht nit, was i doo derzue sell schriibe.
I glaub, jetzt hei doch alli, wo s besser wüsse, ä Schiibe.
Us minere Sicht isch das Fescht doch super gloffe,
Alli hei ä Freud ghaa und hei s gnosse.

Dass so ä grosses Fescht schwer z kalkuliere isch,
Het mä jo gwüsst, aber jetzt lit s uf em Tisch.
Wie vill Millione git mä für anderi Sache us,  es schreit dernoo kei Hahn.
Si heige das nit gwüsst – isch das nit scho villne passiert im Grössewahn?

Si mir doch mol ehrlich und luege ämol umme:
D Medie schriibe jetzt, si sige die, die Dumme.
Aber es isch in letschter Zyt scho meeh Gäld verbroote worde,
Ä jede weiss es, aber das isch halt ä anderi Sorte.

Das Fescht isch doch gsii fürs Volk, wo s liebt, das Schwinge!
Drum säg i jetzt: Gäbet euch d Händ, düent nit lang ringe!
Warte mir ämol ab, bis alles abgrächnet isch, denn chönne mir säge:
Sig doch ehrlich, mir hei s gnosse, bi schönschtem Wätter, fascht ohni Räge.

Und loose mir doch im Volk ämol umme:
Es isch eifach super gsii, es het doch alles gstumme!
Und denn, es paar Joohr spöter, dänkt mä zrugg ans grosse Fescht:
Das isch es super Schwingfescht gsii, und gunne het erscht no dr Bescht.

Kurt Degen, Tschoppenhof/Liedertswil