Brandaktuell?

Käi Angscht – s goht nit um Chrieg und soo.
Es isch miir äifach z Ohre choo,
d Frau Landroot W. häig öbbis gfunde
zum Wirbel mache z Lieschtel unde.

Me müess d Umwält vor Fyynstaub schütze.
Es wurdi drum ganz sicher nütze,
d Auguscht- und d Fasnachtsfüür grad au
genauer z prüefe, mäint die Frau.

Es Gsetz syg zwoor scho formuliert,
aber s wärd chuum respektiert.
Es müessti drum, so häig me gseh,
en Art e zwöiti Füürschau gee,

damit au jeedi Gmäin erkennt,
wär illegal grüens Holz verbrennt.
Iich cha nur sääge: S Chluuri-Füür
het im Fall doo z Sissech hüür

heerlig brennt – und me merkt glyy:
Grüens Holz isch sicher käis derbyy!
Iich reg my drum nid uuf. S isch s Bescht,
me stellt abschliessend äifach fescht:

Grösseri Probleem, so mäini,
git’s zurzyt zum Glück jo käini …

Äigebröödler