Willkommenskultur

Do bini vor Zyte s zwäit Mol in die glychi Beiz. Vor der Türen isch e Fuessmatte gläge. Druff isch dütsch und dütlig gstande «You are Welcome». Wie schön! Wie dehei. Aber s isch nit das, wo mer gfalle het in däre Beiz. S isch d Källnere gsi – «Serviertochter» döff me glaub nümmi sage. Ich ha Grüezi gsäit und si het gantwortet: «Gits wiider en Espresso?»

Gits! Wiider! En! Espresso! Willkommenskultur in Reinform! Vier Wörtli und scho fühlsch di wie dehei. Die Frau het mi samt Espresso-Wunsch noch mehrere Wuche wiiderumme kennt. Das könnt ächt my Stammbeiz wärde.

S Baselbiet het d Willkommenskultur sowiso in de Gen. My Frau Barbara und ich sin s läbige Byspiil doderfür. Bis vor fümf Johr hämmer z Basel in ere Bundesliigeschaft gwohnt und gschafft. Mir hän dört der Kulturpavillon betriibe mit Konzärt und Läsige. Privat. Bim Zoll Otterbach z Kleihünige. Der Gartehaag isch d Landesgränze gsi zu Dütschland. Änedra, d Strooss ab, het die schwizerisch Willkommenskultur gherrscht in Form vom Empfangscenter für Asylsuechendi plus em Usschaffigs-Gfängnis Bässlerguet.

Noch zäh Johr simmer denn im Kulturpavillon nümmi willkomme gsi. D «Schwiz» het is wäge Platzbedarf uff d Strooss gstellt. Z Basel hämmer nüt Neus gfunde, und so simmer z Rynach glandet. Do drüber het e Basellandschaftligi Zytig (Name duet nüt zur Sach) brichtet. Scho am Tag druff hani vo der Bürgergmeind Rynach e Mail bykoo, mir syge do härzlig willkommen und noch drei Johr könnte mir sogar Rynacher Bürger wärde. Willkommenskultur in Reinform!

S Baselbiet het is derno ohni Fidibadänzli integriert. D Lieschtlemer Schnitzelbänggler hämmi uffgno und i ha no nie e fuule Spruch ghört wäge mym Dialäggt. D Barbara übrigens au nit, obwohl si us Berlin kunnt (si singt im Fall kei Schnitzelbängg). As Kulturduo hämmer dörfe drei Johr lang z Dornach s «Gipfelträffe» duurefüehre, e Talkshow, unterstützt vo viile Baselbieter Gmeinde. Sogar d «Volksstimm» ladet mi jetz y, an däre Stell sporadisch e paar Gedangge los z wärde. Mach i gärn. Danggschön.

Wie gsäit, im Baselbiet het d Willkommenskultur Tradition. Bereits vor anderthalb Johrhundert hän do revolutionäri Geischter (und Mensche) us halb Europa Obdach bykoo. E Huuch Revolution spürt me jo ammen immer no am Chienbäse, wenn s Funggefüür anarchisch dur s Stedtli zündet. Aber das wüssener besser as ich.

Obwohl, ich bi jetz au Baselbieter. Ich bi stolze Rynacher Bürger – mit Kleihüniger Migrationshintergrund – und das bereits sit 20 Wuche! Jäjoo!

Ich versuech mi do sälbverständlig au sälber z integriere. Zum Byspiil hani geschter my Welcome-Fuessabträtter ersatzlos entsorgt. Jetz isch er wäg vo myner Tür, dä Welcome-Teppig. Das passt jo nit zum Baselbiet, dass men unseri Willkommenskultur x Mol am Tag mit Füesse tritt, dra d Schueh abwüscht und reschpäggtlos drübertrampt.

Aernschd Born wohnt in Reinach. Er ist Songpoet, Autor und Kulturschaffender.

MUNDART

Image Title

Möchten Sie weiterlesen?

Ja. Ich bin Abonnent.

Ja. Ich benötige ein Abo.

Article

Image Title