Zertifiziert

So, jetzt isch’s also passiert:
Nume wär zertifiziert
isch, isch dur daas privilegiert.
Wär ums Impfe sich foutiert
het, isch entsprächend halt fruschtriert.

Die noony g’impfty Minderhäit
benützt verzwyyflet d Gläägehäit:
S wird nomoll lut und unschiniert
verschwöörigs-theoretisiert …

Au was me vo den Intensiv-
Stazioone ghört, müess selektiv
und kritisch checkt syy. Garantiert
syg’s au vom Bund manipuliert.

Y froog my halt, wohäär all die
ihri Wüsseschaft bezieh.
Dank Google, Wikipedia
darfsch hüt Expärte-Status haa.

Y hoff, die lange Wartezytte
vor Impfzäntre häi gueti Sytte:
Es dunkt äim doch, es syyge doo
e Huffe zu der Ysicht choo

und täile d Aasicht, ass es klar isch:
Nit impfe isch nit solidarisch.

Äigebröödler