Fake News

Miir lüttet äinen aa letscht Fryttig:
«Hesch dä Bock gseh in der Zyttig?»
Doo han y gsäit: «Y stuun e chläi,
hesch du denn d Zyttig scho dehäi?

By öis chunnt d Poscht erscht zimmlig spoot,
mängisch erscht, wenn’s Zwölfi schloot,
oder spööter, dasch nit glatt,
y möchti jo käis Oobeblatt ...»

Aber zrugg zum Blatt vom Fryttig,
wo ihn offebar scho zyttig
ganz soumeessig uufgregt häigi.
«Ebe joo», schimpft är, «es zäigi,
ass jetz d ‹Volksstimm› unschiniert
au scho Fake News produziert!»

D «Fluehbäiz» syg’s, won är doo mäin.
Die ghöör doch nit der Bürgergmäin!
Doo han y gschmunzlet – und dänk ohni
lang z studiere: «Stimmt – jetz noni ...»

Äigebröödler