Underlyybli

Heerrlig. Es git se no. D Gschäft, wo men as Chund no ärnscht gnoh wird. Wo äim buechstääblig d Wünsch vo den Auge, oder in myym Fall vom Ruggen apglääse wäärde. Wil me sünscht mäischtes nummen über daas schrybt und reedet, wo in d Hoose gangen isch, will ich für äinisch au s Positiven erwähne. Au wenns in Zytte vo Corona nit grad lycht isch, es gscheits Verchauffsgsprööch z füehre, han ich glehrt, ass men au mit Muulschutz fründlig chaa bedient wäärde.

Also. My Frau hed zu mer gsäit: «Maa. Du bruuchsch nöii Underlyybli.» Und wenn d Frau daas säit, isch daas esoo. Käi Widerreed. My Liebschti het my uf Gälterchinde zu de Wurschtzipfel gschickt. Dört, so het sii gsäit, gubs e Laade, wo prezyys die richtigen Underlyybli für mii häig.

So bin ich aso zu de Brootwurschtzipfel graadlet. S Weloo han ich vor em Chläiderlaade parkiert und apbschlosse. Me wäiss jo nie. Bim Yynegoo in Laade hed es chlyys Glöggli fröölig bimbelet. Soo hed d Verchäuffere, wo im Chäller Soggen oder Hoosedrääger sortiert, ghört, ass öbber in Laade chunnt.

Dinnen im Chläidergschäft han ich mii wie imene Slalom zwüsche BHs, barchigen Underhoosen und Netzstrümpf zu de Mannen-Underlyybli müese duurekämpfe. Ganz wytt hinde sy amene Gstell Hügüs in Übergrössene ghange. Die fläischfaarpige Blache häi my fascht e chly an Zwöierzält gmahnt. Guet. Ich ha käis Zält welle chauffe. Underlyybli selles syy.

Wie us em Nüt isch underäinisch en elteri Verchäuffere nääbe mer gstande. Und het, ganz esoo, wie sichs ghört, e Muulschutz aaghaa. Sii frooggt my, was ich denn gäärn hätti? «Eermelloosi Underlyybli», han ich gsäit. Was ich denn für e Gröössi häigi? Ou. Doo syg ich überfroggt, han ich schüüch ummegee. D Verchäuffere hed nit lang gmacht und isch mir mit ihren yyschalte Händ obe bim Hemmlichraage der Ruggen apgfahren und hed d Etigette gsuecht, wo d Gröössi druffstoht. Wo sy nüt gfunde hed, isch ihri Kollegyyn derzuechoo. Au sii mit Muulschutz. Sii hed zu mir gsäit, ich selli s Hemmli us de Hoose mache. Velicht stöndi unde bim Underlyybli d Gröössi drinn.

Underäinisch bin ich wien e Hooseglünggi doo gstande. E Chundyyn, wo bi de Bluusen ummegnöised het, het my numme komisch aagluegt. Ich cha se verstoo. Schlussemäänd ischs nit normal, halbblutt im Laade z stoo, numme wil me hed wellen Underlyybli chauffe.

Ich ha my wiider aagläit. D Verchäuffere hed gmäint, s L sygi allwääg scho die richtigi Gröössi für mii. Ich ha drei deere Lyybli gkaufft, ha my früntlig verapschiidet und bim Uusegoo, wos wiider bimbelet hed, gfroggt, öb sy ächt in däm Laaden alle Manne so an d Wösch geeche? Näi, näi, häi beed Verchäuffere gsäit. Das sygi en Uusnaam gsii.

Bim Häifahre han ich mii gfroggt, wies ächt uusechoo weeri, wenn ich no hätt müesen Underhoose haa.

Heiner Oberer (64) aus Sissach, langjähriger redaktioneller Mitarbeiter der «Volksstimme».

MUNDART

Image Title

Möchten Sie weiterlesen?

Ja. Ich bin Abonnent.

Ja. Ich benötige ein Abo.

Article

Image Title