Au käi Lösig

Wär s Velo für an Bahnhof nimmt,
muess zuegee, ass dä Ydruck stimmt:
Das Velo-Parking isch äis Puff
und macht z Sissech d Pändler muff.

Drum sueche d Gmäin und d SBB
gmäinsam nach ere Idee.
D Lösig bringt men an der Gmäini,
doch d Gmäini findt, das syg e käini.

Doo het das Velo-Park-Konzäpt
es richtigs Waterloo erläbt.
Das Doppelstock-Modäll syg schlächt
und funktionieri niene rächt.

D Lüt häige uf dä ober Stock –
d Erfahrig zäigis – gar käi Bock.
Usserdäm würds äimool meh
für d Böim e Radi-kahl-schlag gee!

Böim, das wäiss me, syge prima,
sy hälfen em bedrohte Klima.
Und jetz? Was söll jetz wyter gscheh?
Gsuecht isch e zündendi Idee.

D Velo chönntsch – das weer z bedänke –
als «Mobile» an d Böim ue hänke …

Äigebröödler