D Zeremoniemäischtere

Der Beärdiget isch Atheischt gsi. Der Ustritt us der Chille het er scho vor meh as dryssg Johr gee, wos noni Trend gsi isch. I bi bis jetz no nie an ere Beärdigung vomenen Atheischt gsi. Ha mer bis jetz immer vorgstellt, dass d Äschen ufem Meer über Bord gströit wird oder uf ere Ski-Tour usem offene Rucksack wääiht.

«Jetz isch er am Änd vom Räägeboogen aachoo. Är isch öis vorusgange», het d Zeremoniemäischteren am Grab vom Verstorbene verchündt. Denn het si Stäi und e Scheereschnitt in e Vaase voll Wasser gläit und Chiiselstäi hindedryy gschüttet, zum die groossen und chlyyne Mäilestäi vom Verstorbene z verbildligen und wie sii sich inenander yynefüege. I ha ufmerksam däm bunte Versinke zuegluegt und mer überläit, öb die Ritualbegläitere vorhär ächt Handarbetslehrere gsi isch.

Aber jo, irgendöppis muesch jo sägen und machen in sonere Situation. Mir isch d Gschicht vonere Fründin in Sinn cho. Ihri Familie isch noch em Tod vo der Groosmueter vor der glyyche Froog gstande: Wie der Pfarrer ersetzen und e bsinnlige Momänt schaffe? Si häi sich für Muusig entschiide plus en Abschiidsbrief vom jüngschte Grooss chind an d Oma. D Mueter het churzfrischtig e Querflötischtin us em Noochbersdorf aagfrogt, öb si am Mittwuchnomidaag am halb zwöi Zyt häig? D Flötischtin het über es freis Zytfänschter verfüegt und zuegsäit.

Am Mittwuchnomidaag am zwänzg ab äis het d Mueter nervös vo der Uhr zu de Parkplätz üüberegluegt. Denn het si ihres Handy gnoo und der Flötischtin aaglütte. «Das isch hüt?», het die entsetzt ins Delifoon gschrouen und uf der Landstrooss en U-Turn gmacht. Si het grad im Baumärt es paar Brätter für e Balkonboode welle go hole. Zum Glück isch d Querflööten ufem Rucksitz glääge. Acht Minute spöter häi d Autireifen umen Egge quyytscht und sy diräkt vor em Gottsacker zum Stillstand choo. Verschwitzt und im abgwetzten Overall isch d Flötischtin usgstiige, het d Flöte packt und isch mit drei Minute Verspötig am Grab vo der Groosmueter gstande.

Der Gsang voneren Amsle het mi wiider in die laufendi Zeremonie zrugggholt. In der Zwüschezyt het d Truurredneren au non es Papyyrschiffli in die Vaasen yynegsteckt. Denn het si mit der Handflechi s Glas zueghebt und d Vaase wie wild gschüttlet. «Es het au stürmischi Zyte gee im Läbe vom Verstorbene», het si kommentiert, derzue Sturmgrüüsch imitiert und sich wiene Derwisch um die äigeni Achse drääiht. I ha mer afo überlegge, was chönnte passendi Abschiidswort sy; e willkommeni Ablänkigsbeschäftigung zum e Lachaafall z verhindere. «Jetz isch är by de Räägewürm aachoo. Är isch öis vorusgange.» Oder äfach: «Das wars, zack und ade.» Na ja, es schynt würklig nit ganz en äifachi Ufgoob z sy. Es Gedicht vom Paul Celan zum Schluss het das quere Prozedere non e bitz grettet gha.

Daniela Dill ist Spoken-Word-Autorin, stammt aus Lausen und lebt in Basel. Sie arbeitet im Wortstellwerk - Junges Schreibhaus Basel.