Hooflaade

Der Noldi vom Chlöpfgatterhof hed mer deelifoniert. Ich cha öich sääge, es isch käi schööns Deelifoon gsii. Der Noldi hed mer nämmlig s Härz usgschütted. Und wenn der Noldi schon emool am Schütten isch, blybt käi Stäi uf em andere.

Und daas – Originaldoon Noldi – döönt denn esoo: «My Schwiigerdochter füehrt jo sit e baar Joor e Hooflaade. Bis jetz häi mer nummen am Samschtig offe ghaa. Sit deere Coronakryyse wäärde mer jetz aber jeede Daag vo schyynbaar Usghungereden und Usgmerggleten überrollt. Underäinisch merke die, ass s no Buure git. Sy sy vor der Kryyse in ihre Chäären über d Gränze gfahre, stönde sy jetz, däilwyys mit Muulschutz, uf em Hof ummen und wäi alles zäämechauffe. Ahaa. Underäinisch isch men uf die yyhäimische Metzger, Becke, Buure aagwiise. Die mit de dieffschte Löhn, wo luege, ass niemer verhungeret.»

Der Noldi hoolt dieff Luft und wättered wytter: «Näi, Toilettebapyyr und dröchneti Fläädermüüs häi mer käini, han ich äim müese sääge. Überhaupt. Es isch jo scho verruckt, was in deene Dääg aplauft. Z Amerika chauffe sy statt Hüüslibapyyr Byschtoole. Mäine die ächt, me chönn dä Virus verschiesse? Luschtig isch au, ass in dene schwiirige Zyten underäinisch nonem Militär, em Zyvyylschutz oder de Gränzwächter gschroue wird. Denn das Gschrei ums Gäld. Alli wäi Gäld vom Staat. Aber: Nit en aarpetsloosi Guafföse hed zerscht nonem Staat gschroue. Näi. Es isch e Dieffflieger vo der Swiss gsii. Die vo der Swiss sette doch aber wüsse, ass me settigi Sache hindeduuren apbrittlet – wie d Banke sälbetsmool.»

Ich ha der Noldi wellen underbrääche. Jetz isch er aber erscht rächt in Fahrt choo. «Denn dä Weihbischof z Chur. Dä isch allwääg im 16. Johrhundert blyybe stoh. Er hed jo d Maassnahme gege s Coronavirus kritisiert. Me sell jetz an Gott glaube, ihm verdrouen und bätte. So cheeme d Mensche glütered us der aktuelle Situation uuse. Ich glaub allerdings nit, ass bätten elläi öbbis nüzt. In der Zwüschezyt häi sy ihm aber, näi, käi Muulschutz, sondern e Muulchoorp verordnet.»

Der Noldi hed churz duuregschnuuft und zum Schlussfurioso aagsetzt: «Es wird au durend vo Solidarideet gschwätzt. Das isch jo guet und rächt. Aber Solidarideet funkzioniert nit nummen äiglöisig. Am mäischte hed mii, so druurig as isch, in deere Beziehig e Buurekolleeg us em Noochberdoorff ufgreggt. Er hed öppis vo Solidarideet gschwaaflet und hofft, ass die au in Zuekumft aanehebt. Numme sett me halt zerscht vor der äigene Dür wüsche. D Photovoltaik-Aalag, won er uf em Dach vo sym Hof hed, hed er nämmlig vo Dütschen und nit vo yyhäimische Handwärker lo mache. Wenns ums Gäld goht, isch halt nümme wytt mit der Solidarideet.»

Zum Schluss isch der Noldi denn aber doch no versöönlig worde. Noodäm er der Chropf gleert hed, mäint er: «Gäll, wenn die Kryysen ummen isch, nääme mer wiider e Burgermäischterli zääme.» Prezyys, han ich gsäit. Das mache mer.

Heiner Oberer (64) aus Sissach, langjähriger redaktioneller Mitarbeiter der «Volksstimme».

MUNDART

Image Title

Möchten Sie weiterlesen?

Ja. Ich bin Abonnent.

Ja. Ich benötige ein Abo.

Article

Image Title