S’Doorli isch scho lang gwunderig, wo dr Nigginäggi huust. Wenn’s die Groosse frogt, häisst’s immer: «Im Schwarzwald.» Aber überlegg doch mool: Dasch ääne am Ryy und wyt ewägg. Wie söll dää mit sym Eesel e soone lange Wääg gwaggle? Do bruucht er jo eläi füür hii e Wuche. ...
S’Doorli isch scho lang gwunderig, wo dr Nigginäggi huust. Wenn’s die Groosse frogt, häisst’s immer: «Im Schwarzwald.» Aber überlegg doch mool: Dasch ääne am Ryy und wyt ewägg. Wie söll dää mit sym Eesel e soone lange Wääg gwaggle? Do bruucht er jo eläi füür hii e Wuche. Und apropoo Wald: Das git’s bi öis im Jura au e Huffe und eerscht no schöönere.
Wie gsäit, d’Öltere glaube bikchelhert an das Määrli vom Schwarzwald. Aber velicht wäiss dr alti Böschtler Brezyysers, dää Fuchs kchennt doch jeede. Zeerscht säit er «Schwarzwald», denn blinzlet er «i verroots nit», denn macht er «Pschscht» und chüüschelet «nit wytersääge: Uf em Chrüslibuggel woont er! Chasch em bi dr Chnochestampfi apbasse. Er spachtlet immer Gutsi underwäggs. Wenn d’Spuur verliersch, muesch äifach de Bröösmeli noochegoo. S’isch aber wyt und geech.»
S’Doorli düüsselet zum Uurssi und weit’s yy. «Ha, dää finde mr!» Vo jetz aa schlyyche si jede Mittwuchnoomidaag zum Dorff uus und spienzle uf e Wääg. S’drittmool kchlappts.
Dr Nigginäggi schuenet verbyy und leggt syyni Bröösmeli-Spur. Jetz nüt wie hindedryy, aber immer mit Apstand. Bi dr Hütte verstekche sich die beede zeerscht füür e Stündli oder soo. Eerscht denn dapple si aane. Dää huust aber häimelig! «Und lueg: Me döörff sich doo öppis wüntsche.»
Die «Volksstimme» publiziert in der vorweihnächtlichen Zeit ausgewählte Geschichten aus dem Buch «Dr Nigginäggi isch e glungeni Wuurzle» von Thomas Mosimann. Das Buch kann im Verlag Mis Buech, ISBN 978-3-9523825-7-8 bestellt werden und ist im Buchhandel erhältlich.
