«Jetz bin ich so lang in de Ferie gsi und bi allno müed.» Das het my Maa chürzlig am Zmorgetisch zu mir gsäit und ich ha grad müesen use lache. Stimmt, mir ischs scho au rächt lang vorchoo, eso vill neui Bilder häi mir im Chopf gha vo däm Usfluug. Und s Portmonee het au es rächts Loch überchoo, das het sich fascht wie nach ere Wuche Ferien aagfühlt. Aber eigentlig simmer grad emol 36 Stund furt gsi. S Programm isch au nit grad uf Erholig usgrichtet gsi. Am Sunntig simmer zoben im «Rulantica» gsi, in dere riisige Wasser-Vergnüegigswält bim Europapark, was für eus, wo nit eso flyssigi Baadigänger sy, trotz allem Vergnüegen au no rächt aasträngend isch. Ellei sich dört zrächt z finde mit dene ville Rutschbahne, Bade-Becki und Attraktione het es Zytli bruucht – do het alles Plän studiere nüt gnützt, für eus Landeier isch das eifach überwältigend, was die dört aane gchlöpft häi. Am Schluss häi mir nit emol alles gsee, so grooss isch das dört – do chunnsch fascht nümm zum Stuunen us.

Eusi Meitli und mir häi uf jeede Fall der Plausch gha an dene Rutschbahnen und am Ummeschwaadere. Esoo, ass mir sogar s Znachtässe vergässe häi – zum Glück hets in der Hotelbar none chlyne Snack gee für eus, ass mer nit grad ohni Znacht ins Bett häi müese.

Trotz allem Stuune: Für eus als Buuren ischs natürlig au e chly es zwöischnyydigs Schwäärt a somenen Ort. Wenn me dänkt, wie vill fruchtbaari Acherflächi verboue worden isch, «numme» zum puure Vergnüege vo de Lüt. Aber söttigi Gedanke dörfe mer eus nit z vill mache, süscht chönne mers denn plötzlig gar nümme gniesse. Oder mir gönge gar nümm. Und für das gfallts eus denn glych z guet.

Dorum hämmer am Meentig grad non e Daag Europapark aaghänkt. Dä kenne mer zwar schon e chly besser, aber trotzdäm ischs nit grad das Programm, wo verspricht, ass me total usgrueiht zrugg chunnt. Aber wie säit my Maa so schön: «Wenn ich s Zahnbürschteli mitnimm, sys Ferie!» Und dorum ischs allwä au der Aaspruch, ass me denn schon e chly erholt sött zrugg choo. Hejo, schliesslig sys jo Ferie.

Eigentlig weer allerdings nit plant gsi, ass das eusi einzige Familieferie blyben in däm Summer. Mir hätten eusne Chinder dä Summer s erscht Mol s Meer wölle zeige. Das het leider nit klappt – derby hätte mir jetz sogar ohni schlächts Gwüsse furt chönne, eus goht nämmlig truurigerwyys langsam d Arbet us, wenns no lang eso troch blybt. Ämmel die uf em Fäld usse. Aber das häi mir jo im Früehlig nonig chönne wüsse. Und eso ischs denn vorläufig bi dene 36 Stund Europapark bliibe. Und d Erholig am Meer mues no chly warte. Aber wie säit me so schön, ufgschooben isch nit ufghoobe. Villicht schaffe mers jo im Herbscht non e Wuche furt z goo.

In der Zwüschezyt hoff i, ass my Maa nit plötzlig no uf d Idee chunt, s Zahnbürschteli uf e Bagger oder in Traktor mitznee, süscht hani denn s Gschänk. Denn will er gar nümme furt, wil er jo scho allbott in de Ferien isch.

Stefanie Spycher-Gass (41) ist ehemalige Redaktorin der «Volksstimme», Mutter von drei Töchtern und bewirtschaftet heute mit ihrem Mann einen
Bio-Bauernhof in Oltingen.