E Heissluftballon am Himmel oobe. Das isch sit myner Chindheit es Bild, woni gärn gsee. I weiss no, wie mir ammen in d Röti ufegsprunge sy, ass mir der Ballon am Himmel besser gsäie – oder mit em Velo hindedryy gfahre sy. Und wie mir gwunke häi wie verruckt. Au eusi Chind chömmen grad cho z springe, wenn öbber «E Baloooon» rüeft.

Mit em Ölterwärden und sitdäm ich Mami worde bi, bini zwar in villne Sachen ängschtliger und vorsichtiger worden. I hock nümm wie frühener in d Chääreli vo de wildischten Achtibaane. Au e Sprung am Gummiseil vo der Staumuur chönnti mir höchstens imnen Albtraum vorstelle. Aber e Fahrt mit em Heissluftballon isch scho immer ganz wyt oobe gstanden uf der Lischte vo deene Sache, woni emol wött erläbt ha. Letscht Joor uf e runde Geburtsdaag het mir my Familie dä Wunsch erfüllt. Ass es none wyte Wääg isch, bis ich in d Luft cha, hani denn nonig gwüsst. Zerscht emol het der Guetschyyn vo der Gschänkplattform in e «richtige» Guetschyyn vo der Ballongsellschaft müesen umgwandlet wärde. Denn hani chönne der Flugplan studiere. Ballonfahrte wärden an allergattig Ort in der ganze Schwyz abotte. Für eus – my Maa darf au mitchoo – ischs aber klar gsi, ass mir in euser Region wäi starte. Au wenn me natürlig bimne Heissluftballon nie genau weiss, wos ihn denn aane tryybt. Das isch s Schöne draa. Gly isch der Termin buecht gsi. Ass es nit nummen es schwiirigs Buuresondern au es schwiirigs Ballonjoor wird, hämmer zu däm Zytpunkt nonig gwüsst.

28. Juni 2024 – erschte Versuech. Dä Termin isch abgsäit worde wäge labile Luftschichte, Windböen und eventuell Gwitter. Das würd denn au ins Kapitel Albtraum goo, mit eme Heissluftballon in es Gwitter yyne z cho. Also häi mir dä ganz Kaarsumpel mit deren Aamäldig nomol gmacht. Und das isch nit wenig, was die alles wäi wüsse: Nit numme Name, Geburtsdatum und Kontaktaagoobe. Die wäi au wüsse, wie schwer men isch, schliesslig dörfe si dä Chorb nit überlaade. Denn mues me no aagee, öb me cha mithälfe bim Ufbou und bim Zämmeruume.

15. September – zwöite Versuech. Wiider d Noochricht: Z vill Wind, Bise, Böe – z gföhrlig. Also häi mir die ganz Gschicht nomol usgfüllt – äifach nomol fürs falsche Datum. Der goldig Herbscht isch nämmlig genau wo mir häi wölle go Ballon fahre, nit eso goldig gsi: 10. Oktober – dritte Versuech. Abgsäit wäge Wind, Wulche, Rääge. Eus ischs verleidet und mir häi die Gschicht vertagt … Neus Joor, neus Glück.

Im Früehlig ischs mer wiider in Sinn cho und i ha der Flugplan studiert. In der Wuche nach em Oltiger Määrt, das isch der richtig Momänt für sones entspannts, lutloses Gleiten in der Luft. Also hani wiider alles usgfüllt, der Termin usgwehlt – aber scho glyy het der Wätterbricht lo erahne, ass es au daas Mool nit klappt.

Dorum warte mir no. Aber wie säit me so schön: Vorfreud isch die schönschti Freud. Wär weiss, villicht schwääbe mir gly einisch über s Baselbiet. Vergässed denn nit uufe z winke!

Stefanie Spycher-Gass (41) ist ehemalige Redaktorin der «Volksstimme», Mutter von drei Töchtern und bewirtschaftet heute mit ihrem Mann einen
Bio-Bauernhof in Oltingen.