Der Neofütt probiert, sich uff Ungryymts e Ryym z mache

Sissech
En Ortspartei doo git sich gärn giftig, stichelnd, grüen, modärn. Der Name chunnt mir nid in Sinn. S het Stachle und, glaub, Palme drinn. D Regez*in plant mit ihre Fründe, au es «Bündnis Sarah» z gründe. Statt Bäum im Name würd sy denne die Ortspartei churz «Stächschritt» nenne.

D Clique sölle meh studiere. Statt immer nur «mir jubiliere». Dir müeset euches Hirni queele und meh lokali Sujets wehle. D Chilchbrg-Rugger häi äis gfunde: «Mir jubiliere z Sissech unde.»

D Bürgerrööt, die häi nach Stunde am gääle Wyyhuus Gfalle gfunde. Doch glyy scho schäide sich die Gäischter: Jede weer gärn Chällermäischter. Der Chauf vom gääle Wyyhuus Buess isch für e Bürgerroot es Muess. Nid wäg em Wyy, das isch e suure. Doch het s wärtvolli Pilzkulture.

En Architekt macht öis ganz schyssig: Quartierplaanfassig nünedryssig. «Daasmool ryss y alles ab. Als Byschuu übrig blybt nur s Pub.»

Gits e 13. AHV? Alli sääge: Joo, genau. Nur der Wittschbg isch dergeege. Was die dört oobe überleege? Grad z Sissech findet me daas guet, süscht nimmt der Buser nie der Huet.

D Paola mit däm lange Name isch am Klavier e grossi Dame. Sit zäh Johr lehrt sy Sissech jetze au die klassisch Muusig z schetze: Chopin, Mozart, Brahms und Bach. Käi Froog, die Frau, die isch vom Fach. Am Jubiläum spricht der Yysy und säit: «Jetzt spiil no s Vogellyysi.»

Im Gmäinroot isch der Summermärt Käi bsunders höchi Summe wärt.

Bim Themewääg an jedem Stand stoht «Handel», «Händel» und no «Hand». «Handel» wäg der Handelsstrooss, vor Johre macht die Sissech grooss. Und «Hand», das lyt jo uf der Hand, mäint s Wappe, wenn ichs rächt verstand. E Ryym druuf aber find y käine, was d Macher mit em «Händel» mäine. Oder het me glyy scho gseh, ass mit em Epple Mäis chönnt gee?

Die Tschudy-Villa stoht kabutt mit Räschtstolz zmitz im äigne Schutt. Der Häimatschutz möcht se beschütze, der Wyybuur sy Parzälle nütze. So chan är gmüetlig Düumli drülle, sii stoht dumm do in ihrer Hülle. Hätt är denn doch no Mumm (und Stutz), stoht s grüene Schutznetz unter Schutz. Em alte Chef vom Häimetschutz entfahrt es härzhafts «Gottfridstutz». Em nöie Breesi Tomaselli entfahrt es härzhafts «Gopf … dasch schaad».

Zämme gohts besser
Me durnt in Dürne – Männli, Wyybli, Jung und Alt – im glyyche Lyybli. Nümm eläi, so sääge d Durner, mir sy doch käini Solothurner. In Rü-Ki-Ze die glyyychi Haltig: Die drei däile sich d Verwaltig. Jetz zimmere sy es Dreyerbett, wo s erscht no Platz für Arschdf het.

Drum wäi sie nümm studiere, e vierti Gmäind no z annektiere. Jetz hämmer zämme schön Land, löje deene Dääne Grönland.

Bald fusioniere d Bärg im Land und Täli liebli mitenand. D Voliere, s Marabu: Sälbscht die Fusion isch käis Tabu. Veräint wird au, das bruucht käi Muet, der Zivilschutz grad under äi Huet. Gmäinsam dörfe jetz die Liebe im Kaffi d Zyt verdryybe üebe.

Und vo der Chille gar nid z reede: Mit jeedem paart sich hütte jeede. Statt ora et labora herrscht Sodom und Gomorrha.

Es Näi chunnt nur vo Herschbg hinde, will sii dört doch gnue Gmeinrööt finde. Nid d Angscht vor Arschdf isch der Grund, me mäint, dass «öise Erich» chunnt. Es anders Byspill ääne uuse: Buus nimmt Bürger an sy Buuse. S gooht zämme besser, äifach, gschwind. Nur Zunzge blybt es Äinzelchind.

Gälti
Der Carlo Frey chas chuum erwarte: Vo Gälti gohts zur Schwyzer Garde. Und alles will in Rom drbyy sy, Familie, Fründ, sogar der Yysy. «Gits z Rom ächt», frogt är voller Gwunder, «zum Oobemohl e Blauburgunder?» Der Baschi säit, vor Nyyd ganz bläich, by sym Konzärt: «Das weer käi Säich. In Rom chönnt ich mit deene Pfaffe im Papscht sy ganze Weihrauch paffe.» Süscht rauchts der Carlo dört eläi. Drum rüeft der Baschi: «Bring en high.»

Bäizer
Tartuffo, pulpo al limone pepe, penne al salmone. Der Starchoch chocht für syni Gescht im «Rössli» oben nume s bescht. Und statt em Ruugeli mit Hopfe serviert är nur erläsni Tropfe. An der Düre zäigt er gärn d Millau-Pünkt und d Michelin-Stärn. Doch wo äin Ghackts mit Hörnli will, wirds in der Chuchi müüslistill. Der Chef het nümm lang überläit und statt «Pasta» «basta» gsäit.

Was isch im Bistro z Sissech s Bescht? Es git dört meh Konzäpt as Gescht.

In Eptige, do säit der Schwander:
«Sali alli mitenander, Wytter macht der Alexander.»
Schloss ‘s Bad zu, und dann ver-Schwander.

Denne sy do no
Weeles sy die Schlächtere?
Die Rächte oder Rächtere?
Die SVP git, gottfriidstutz, au intärn nüt uf Klimaschutz.

Der Wöschbär nimmt es bitters Änd, der Wirz Rolf chündet s Jagdpatänt. «Die dänke nüt! Drum fertig gschasst. Dä hätt bi öis in Gemäinroot passt.»

Bim Ryyme ryymt «Florence» uf «Trance» und «käi Chance».

Trump und Vance sy näbem Riebli fascht e bitzli Wäise-Büebli.

Vo deene vill z vill Fraue z Bärn häig me d Maya bsunders gärn. E Studie het sogar beläit, dass käini so vill Yyfluss träit. Die Studie aber muesch vergässe. Me het statt Yy- der Sproochfluss gmässe.

Der Ussedienscht mäldet
Lupsige will s Klima schütze, statt Heizöl git s dört Wullemütze. Doch wird das härzlig wenig nütze, wenn sy z Ziife Gülle sprütze. (I wäiss, nid «Mütze», das häisst «Chappe». Doch würd dä Ryym mit «Chappe» klappe? He näi, drumm halt jetzt d Chlappe, Pappe! Süscht gits am Schluss no äin uf d Mütze.)

In Zunzge wäi e baar Ungare meh zum Hunnegrab erfahre. Löjet der Büchel lo stoh, i bitt, und nämmet der ganzi Räschte mit.

Was dänke sich do nur, zum Gugger, d Ruinegäischter, d Buusner Rugger? Sissech ohni Larvepflicht; statt Fasnachtslarve s blutte Gsicht. Wenn d dänksch, was d alles machsch und duesch, syg froh, wenn d s Gsicht nid zäige muesch.

Der Skilift z Langebrugg verschwindet. Und will me no käi Chäufer findet, chunnt är z Waldeburg neu z stoh, die dunde sy um alles froh, wo als symbolischs Zäiche stoht, dass s näb de Stüüre ufwärts goht. Jo, d Waldeburger häis rächt schwer: Au daas Johr d Kasse gähnend leer. Denn het se nones Unglück bräicht: S alte Badi-Bassin … rünnt. In däm Fall luttet d Froog villicht: Macht mes statt dichter gscheiter dicht?

Abstimme
Der Jurapark weer s Paradyys. Doch het das Paradyys sy Pryys. Drum froogt me nooch an jeder Gmäini, was s gmäine Volch derzue ächt mäini. Und mäinsch, s isch bschlosse, muess me denne wäg däm Park an d Urne renne. Bim Stimme machsch dir vill Gedanke: Ächt Jo? Ächt Näi? Muesch nid z lang schwanke. My Tipp am Ändi vo däm Värs: Mach s Chrüzli äifach bi «divärs».

Mir üebe jubiliere
Der Hund macht s Männli, s Chind spillt Flöte, i sing derzue, der Maa liist Goethe.
S git Tee us sälber gmoolte Tasse, zäh Gescht knapp würde yynepasse.
S OK dankt und säit: «Eus dunkt, das isch am Fescht der Höhepunkt.»

Im Jubeljohr goht s kunterbunt: D «Volchsstimm» schrybt sich d Finger wund. Und denne gits sogar e Pin. Das weers denn emoll. Immerhin!

Der Peter Buuser säit zum Bobby: «So Dorffescht sy nid grad mys Hobby. In hundert Johr wird s besser, Brueder. I hoff, y blyb bis denn am Rueder.» Do säit der Bösiger zum Peter: Dass är nüt miechi, joo, das gseht er. Der Manz wird böös und bösiger, der Bobby drum närvösiger.