Zwee elteri Mannen an der Türe vom ne Kaffi z Sissech:

Jetz cheibs, lueg au do! Jä gits di au no? Scho lang nümm gsee.

Jee aber au! Sali du, dasch jo gläb scho ewigs här. D Zyt lauft, he!

Und wie heschs? Fit sowyt? Jo, me chunnt dervo. Machsch, was chasch, gäll.

I sääg immer, me muess’ nee, wies chunnt, stimmts oder han I rächt?

Jo, das chasch meini lut sääge! Und süscht, goots oordeli?

Danggschön. Sälber au? Jo, I wüsst nüt anders und vo däm här, oder …

Scho schöön, ass men amme doch no öbber aatrifft. Die meischte Lüt kennt me jo nümm do, dasch jo s Eländ, wemme so dänkt, he …

(Pause)
Jä guet, also, s het my gfreut! Aber loos jetz, I sett e Huus wyter. Bis gly wiider emol, alles Gueti …

Aso, tschüssli und Grüessli dehei im äh … wie heisst sii jetz no, Pfrau, meini?

Pfrau? Jä weeli?
Weeli, säit er, du! Heieiei, bisch allewyl no der glych, he! Alter Kater lässt das Mausen nicht, he …

Chasch dänke. Bevor s Huehn chasch bröötle, müesstisch s zerscht emol schlachte …

Wie meinsch jetz das? Do chumm I nit nooche …

Will I ha jo keini … e Frau, meini.
Waas? Keini? Jetz hesch doch grad gsäit, weeli, ass I gmeint ha, hebsch emänd zwee, du Schlitzoor!

Was ächt! Weeli, han I dänk gfroggt, wil I jo gar keini ha.

Jo waas? Aber du bisch doch der … äh … chumm, säg nomol … weisch mit
Nääme bin I efangs nüt mee, verglemmi!

Der Mundschi Pauli, bin I dänk …
Duu? Jo waas? Aber herrschafts, I kenn jo gar kei Mundschi Pauli.

Aber wemmi denn nit kennsch, worum hausch mi denn aa?

Ebbe wil I gmeint ha, du sygsch der Dings do, ebe, der … äh …

Nei, dä bin I aso nit!
In däm Fall mol en anderi Froog: Wohär kennsch denn du mi?

Ebben, I weiss au nit so rächt …. I ha mi halt gschiniert, öbbis z sääge, wil du jo mi kennt hesch. Wär bisch denn du?

Eh, der Schaub Dölf bin I doch!
Der Schaub Dölf, säisch? Nei du, das säit mer jetz grad gar nüt! Sorry he.

Jä, das darf doch nit woor sy: In däm Fall kennt men enand jo gar nit!

Jo, allem Aaschyn aa e falschi Verwäggslig, ä beidersytigi!

In däm Fall nüt für unguet, Herr Mundschi!

Ganz mynersyts, Herr Schaub, ganz mynersyts, jo und vo däm här, oder …

Aber under eus, s isch doch schöön, macht me zwüschenyne no zuefellig ä nätti
Bekanntschaft und chunnt eso interessant ins Gsprööch mit öbberem.

Do gib ene rächt, Herr Schaub. Und s neggscht Mol nämmer eine zämme!

Sell gälte! Und no mache mer Duzis, Herr Mundschi, gällesii, wemme sich jetz scho kennt.

Florian Schneider wurde 1959 geboren und stammt aus Reigoldswil. Er ist Sänger, Schauspieler und Liederschreiber und lebt mit Tochter Mina in Eptingen.