Kunnt jetz tatsächlig scho wiider die Summerzyt?

Kunnt jetz am Sunntig scho wiider die Froog vo de Frooge? Mues i der gross Zeiger vo der Wanduhr ei Stund fürsi dreihe? Oder doch ei Stund hinderzi?

Und kömme jetz au no unweigerlig all die Zuesatz-Frooge, wo mir der Schloof raube?

Hämmer jetz in der Nacht uff e Sunntig e Stund gwunne? Oder eini verlore? Und wemmer si verlore hän, wo sin si liige bliibe, die sächzig Minute? Gits Fundbüros für verloreni Stunde? Gits Schalter für die verloreni Zyt? Und wenn öbber e verlores Stündli gfunde het – bikunnt dä Finderlohn? Und wie vyyl? Und vo wäm? Und in welere Form? Öbben als Zytguetschrift?

Weli Stund fählt mer am Morge früeh? Isch es die Stund zwüsche Zwei nullnull und Drey nullnull? Oder isch es die letschti Morgestund? Also die Stund vor em Uffwache? Und wär schällt mi so aggressiv us em Morge-Schlummer?

Isch es tatsächlig my alt Wegger? Vernichtet dä myni letschte Morgedräum? Oder han ich eifach my Wegger falsch yygschtellt? Han ich irrtümlig uff s «Schälle»-Knöpfli druggt, statt uff e «Summer»-Knopf, für ass my Wegger numme no lyslig summt?

Heisst eigentlig d Summerzyt Summerzyt, wil der Summer im Summer eim länger losst lo schlummere? Bin ich sälber gschuld, wenn i nit ka fertigschloofe?

Schloof i z langsam? Sott ich effiziänter dräume? Sott i my Schloof besser in Griff bikoo? Gits Kürs für d Optimierig vo der Schlof-Kompetänz?

Oder ligts gar nit an mir? Ligts eventuell am internationale Zytmanagement? Mues men uns denn ums Verworge grad e volli Stund Schlof am Stügg abzwagge? Wärs nit aagnähmer, mir miechte die Zytverschiebigen e weneli weicher? Also Schrittli für Schrittli, statt Tritt um Tritt?

Hätte mer nit zem Byschpiil scho Ändi Jänner können aafoo mit däre Summerzyt? Hätts irgendöbber gjuggt, wemmer am Morge vom 28. Jänner ei Minute früehner gweggt worde wäre? Ei einzigi Minute? Und em Morge druf nomol ei Minute früehner? Wär das für irgendöbber e Problem gsi? Jede Dag ei Minute früehner uffschtoh? Ei Minütli früehner als am Vortag? Sin sächzig mol ei Minute nit au e Stund? Kämte mir eso nit au am nöggschte Sunntig punggtgenau uff d Minute bi der Summerzyt aa – und das ohni verschloofeni Biire?

Hätte mir uns eso nit zwei Mönet lang minutewyys sogar der Zyt vorus bewegt? Wär son e stuefeloosi und weichi Aanöcherig an d Summerzyt nit menschliger? Natürliger? Schwyzerischer? Wäri das nit super entspannend, wemmer vo hüt am Dunnschtig bis uff e nöggscht Sunntig numme no drei Minute Schloof müessten uffhole, statt e ganzi Stund?

Könnti nid zem Byschpiil s Baselbiet autonom und versuechshalber die weichi Summerzyt yyfüehre? Wär eso nit s Baselbiet wenigschtens zwei Mönet lang der Zyt vorus? Wär das nit emol öbbis? Sin no Frooge?

Uff all Fäll wünsch ich allen e schöni Summerzyt.

Aernschd Born wohnt in Reinach. Er ist Songpoet, Autor und Kulturschaffender.