Mit Chinder erläbt me bekanntlig allergattlig Sache. Nit ass emenen Erwachsene nit au emol e Säich bassiert. Im Geegeteil. Wenn aber eim vo eusne Chinder e Säich bassiert, denn merkt me das gwöhnlig innerhalb vo Sekundebruchteil. Eusi mittleri Tochter isch chürzlig dur d Türe cho z schlyyche mit däm Blick, wo käi Zwyyfel offe gloo het. Öbbis stimmt nit. Eigentlig het si nume gschnäll im Kofferruum vom Auto wölle go ihri Jagge hoole. Aber das isch schief gange.

«Ich ha der Autoschlüssel im Auto yybschlosse», het si ganz duuch gsäit und derby sy ihre d Träne z vorderscht gstande. Mir häi eigentlig grad wölle go Zmorgen ässe. Si aahnes scho – natürlig nit dehei. Mir sy für ei Nacht im Bärner Oberland gsi und häi eus scho ufs Zmorgebüffet mit grandioser Ussicht uf e Thunersee gfreut. Aber jetz isch zerscht mol Kriisestimmig agsäit gsi. Die Jüngschti: Angscht, ass mer nümm häi chönne. Die Mittleri: schlächts Gwüsse bis an e Dubak. My Maa mit der Lösig: «Ich schloo e Schyyben yy.» Die Öltischti: Trääne, wil denn s Auto kaputt isch. Ganz genau esoo häi mir eus doch die churzi Uszyt vorgstellt gha.

Mir häi überleit, wie mir am äifachschten und choschtegünschtigschten us däm Schlammassel uusechömme. Villicht het öbber vo der Familie Luscht uf es Usfährtli? Do isch mir in Sinn choo, ass ich gaar nit weiss, wo eusen Ersatzschlüssel isch. Dä isch schon es paar Dääg verscholle gsi. Villicht häi mer en jo unbemerkt doch derby? Also hani zerscht mol d Handtäschen und alli andere Täsche kehrt, in der Hoffnig, ass der Ersatzschlüssel neumen imene Fächli füüre chunnt. Fehlazeig. Also het en anderi Lösig aane müese. Mir häi nit rächt gwüsst, öb mir sölle lachen oder brüele.

Mir häi eus denn bim Zmorge für d Variante Pannehilf entschiide – hejo, für öbbis gits die jo. Und wil der TCS anschynend grad nit eso vill z due gha het, isch er sogar innerhalb von ere Halbstund vor Ort gsi. Zerscht emol hani e Haftigsuusschluss müesen unterschryybe für allfälligi Schääde, wo am Fahrzüüg dur die Aktion chönnten entstoo. «Na Bravo», hani dänkt. Denn hätte mer jo au sälber chönne d Schyyben yyschloo. Aber der nätti Herr het mi besänftigt. «Normalerwyys» bringi är sones Auto wie mir häi, ohni Schääden uf.

Glyy het er mit sym Spezialschlüssel im Türschloss afo umegusle. D Panzerknacker wäre vor Nyyd erblasst; nit emol drüü Minute spöter het er das Türschloss offe gha. Der Stei, wo eusere Mittlere vom Härz gheit isch, het me förmlig ghört aaberolle Richtig Thunersee. Natürlig isch au s Konto noocher e chly lyychter gsi – aber wenigschtens hets Stoff für e neui Kolumne gee.

Übrigens: Der Ersatzschlüssel isch denn doch no füre choo. Am nögschte Daag, im Jaggesack vo der jüngschte Tochter. Die Jagge, wo am Vortag im Hotelzimmer an der Garderobe ghangen isch. Mir hätten eus chönnen ins Füüdle bysse!

Stefanie Spycher-Gass (41) ist ehemalige Redaktorin der «Volksstimme», Mutter von drei Töchtern und bewirtschaftet heute mit ihrem Mann einen
Bio-Bauernhof in Oltingen.