My Sohn het sich es nöis Deo gwünscht. Was in myner Jugend s «Axe Alaska» gsi isch, isch momentan bi de Teenie-Jungs s Kultdeo «Old Spice». Das wird vome coole Comedian witzig beworben und dorum wäi das jetz schyynts alli ha.

Ich stand also vor däm vier Meeter lange Deoregal, suech das «Produkt der Begierde» und stell fescht, ass es sächs Sorte von däm git. Alles fantasievolli, änglischi Näme, wo das Ding doch im beschte Fall nur zueverlässig der Teenieschweiss vo unduschte Buebe sett neutralisiere. I weiss nid, öb my Jüngling nach «Captain Traveller» oder «Epic Legend» wett dufte.

Näbedraa stönde no ganz vill neui Deos und mir fallt uf, ass die immer no meh müesse chönne. «48 Stunden Schutz», das kennt me jo und wär froggt sich nid, wie sones Deo eigentlig merkt, wenn die 48 Stunde verby sy? Und isch es ächt beleidiget, wenn me vor deenen 48 Stund duscht?

I ha vor 25 Joor Drogischtin glehrt – übrigens z Sissach. Dört hani der Unterchiid vo Deos und Antitranspirant und sämtlichi Inhaltsstoff müessen usswändig chönne. Aber was do hüt in ere Kosmeetikabteilig umme stoht, überforderet my amme biz. Es git zum Byyspiil «Whole Body Deos», wo me sich an ganz Körper cha schmiire. Abgseh dervo, ass Schwitzen us medizinischer Sicht rächt guet und menschlich gsee eifach normal isch, hani s Gfühl, d Instustrie git eus immer meh vor, was men alles nümm dörf oder unbedingt sell mache.

Vor e paar Joor isch es der Kampf gege sämtlichi Hoor gsi. 5-fach Rasierklinge gege die böse Körperhoor sy jo scho lang Standard. Aber am beschte lot meh grad alls lo wäg lasere, Hoor sy schyynts pfui! Usser uf em Chopf, do sett men am beschte vor em Hoorwäsche schon e Spüelig dryy due, und wär mit lange Hoor nid mit ere Syydehuuben oder uf eme hoorschoonende Chüssi schlooft, het eh ufgee! Es git Vitamin-Gummibäärli zum s Hoor-Wachsdum fördere. Und au Produkt, wo me denn die «lästige Babyhaare» cha kaschiere. Ich frog my jo au, öb sones Shampoo für trocheni Hoorspitzen und fettigi Chopfhutt überhaupt weiss, wo was isch.

Vo der Uswahl an alters-ufhaltender Gsichtspfläg ganz z schwyyge. Me sett jo scho vor 30 d Spuure vom Älterwärden afo wäggpflääge. Wenn Sy my frooge, isch «nid rauche» und s ganz Joor e guete Sunneschutz benutze die bescht Vorsoorg, ass me nid irgendwenn wien e schrumplige Lääderöpfel usgseet. Aber ich finds au schön, wenn men ame Mensch aagseht, ass er läbt und e Mimik het.

Aber zrugg zum verpöhnte Schwitze. Egal öb vom warme Wätter, vor Ufreegig oder wil d Wächseljoor schweisstryybend sy – schwitzen isch normal! Und Hoor am Körper au. Jeede, wies em wohl isch. Woby ich bi deene Temperaduure scho zume Deo würd roote. Ich ha für my Bueb übrigens d Duftrichtig «Rockstar» gno, eifach wils guet dönt und ich vor luter Noochedänke langsam ha afo schwitze.

Marianne Lindner-Köhler, 1981 im Baselbiet geboren und aufgewachsen, lebt mit ihrer Familie in München. Als Mary Long tritt sie auf bayerischen und Schweizer Poetry-Slam- und Kleinkunstbühnen auf.