Ich ha nüt gäge d Bürokratie. Im Gägeteil! Irgendneume mues jo s Chaos vo däre Wält ordentlig abgleggt wärde. Nit nummen in der Schwyz.

Als junge Maa han ich e paar Johr z Mailand gschafft. Vor guet 50 Johr. Dört han ich als Erschts müessen uff s Arbetsamt. Wil ohni Arbetsbewilligung kei Arbet. Eigentlig logisch. Und Ihri Uffenthaltsbewilligung?, häns mi dört gfrogt. Scusa? Ohni Uffenthaltsbewilligung kei Arbetsbewilligung. Au logisch, eigentlig.

Also hami uff e lang Wäg gmacht zum Amt für d Uffenthaltsbewilligunge. Und Ihri Arbetsbewilligung?, häns mi dört gfrogt. Scusa? Ohni Arbetsbewilligung kei Uffenthaltsbewilligung. Eigentlig logisch.

«Cosa fare?», hani wüsse welle. Die Beamti frogt ihre Kolleg näbedra. Si föhn lut aa diskutieren und glyy befasst sich s ganz Grossruumbüro mit mym Fall. Uno Svizzero in Italia! Grosses Palaver, au unter däne, wo hinter mir Schlange stöhn. Ich ka no kuum Italiänisch, verstand kei Wort, aber noch 20 Minute git mir die Beamti e Schryybe plus Stämpel plus Unterschrift für s Arbetsamt mit.

In däm Papier versicheret s Uffenthaltsamt em Arbetsamt, si gäbte mir en Uffenthaltsbewilligung, vorusgsetzt, ich bikäm vom Arbetsamt en Arbetsbewilligung. So bini mit em e Papierli plus Stämpel plus Unterschrift vom Arbetsamt wiider zrugg uff s Uffenthaltsamt und ha denn dört au problemlos beidi Bewilligunge bikoo.

So vyyl zur unbürokratischi Bürokratie vor 50 Johr!

Und hüt? Do hani kürzlig vo der Kranggekassen e Schryybe bikoo. In ere Fremdsprooch namens Dütsch. Ich ha dä Brief zum bessere Verständnis in Mundart übersetzt. Unglooge Wort für Wort.

«Betrifft: Verwäggslig vo der QR-Rächnig bi der Zahlig vo der aggtuelle Prämie

Sehr geehrte Herr Born
Ihri kürzligi Zahlig für d Monetsprämien isch bi uns yygangen und mir danggen Ihne doderfür.

Mir hän feschtgstellt, ass d Aazahl vo de Prämie, wo das Johr zahlt worde sin, korräggt isch. Allerdings isch d Reihefolg nit yyghalte worde, was offebar uff en eifachi Verwäggslig zruggzfüehren isch.

Zum d Verwaltig vo de Zahlige besser z verstoh, ordnet unser Syschtem d Zahlige de verwändete Referänze zue. Drum isch es wichtig, d Rächnigen in der chronologische Reihefolg vo de Mönet z beglyyche.

D Informatione zu de Fälligkeiten und Mönet finde Si in de Dokumänt, wo de Rächnige byygfüegt sin. Zem Missverständniss bezüglich der Versändig von er e Mahnig z vermyyde, bitte mir Si, d QR-Rächnig für en Oggdober 2026 z verwände. Si finde die im Kundeberyych, im E-Banking, E-Finance oder unter de Dokumänt, wo Si per Poscht bikoo hän.

Wenn Si Frooge derzue hän, simmer gärn für Si do. Mir danggen Ihne für Ihri Mithilf und mir grüesse Si fründlig. Ihri Kranggekasse.» Was jetz? Kei Ahnig! Ich wart emol uff d Mahnig. Wie gsäit, ich ha nüt gäge d Bürokratie! Me sott sen eifach nit de Bürokraten überloo. Logisch, eigentlig.

Aernschd Born wohnt in Reinach. Er ist Songpoet, Autor und Kulturschaffender.