Jungi Dräum. Alti Dräum.
19.11.2026 PersönlichMit em Alter wird men älter. Bi mir isch es ämmel eso. Also bi mir als Maa. Über s Alter vo de Fraue möcht i mi lieber nit üssere. Do bin i höggscht inkompetänt. Und d Finger wötti mir jo au nit verbrenne.
Aber ich als Maa stell fescht, ass i mit em ...
Mit em Alter wird men älter. Bi mir isch es ämmel eso. Also bi mir als Maa. Über s Alter vo de Fraue möcht i mi lieber nit üssere. Do bin i höggscht inkompetänt. Und d Finger wötti mir jo au nit verbrenne.
Aber ich als Maa stell fescht, ass i mit em Altere nit unbedingt besser wird. Au nit kräftiger oder witziger oder gscheiter – und schlagfertiger scho grad gar nit. Im Gägeteil. Bis ich bim Ummegää bi mynere Schlusspointen aakoo bi, isch d Karawane scho längscht hinter alle Düne verschwunde – und my genial Spruch versandet verspötet und unbemerggt irgendneumen imene Getriib.
Kurz und guet: S Alter bringt nit so wahnsinnig vyyl Vorteil gägenüber der Juged. Usser ein. Genau! Ei gwaltig Plus hän mir Alte gägenüber de Junge. Mir Alte sin nämmlig alli scho mol jung gsi. Aber umgekehrt? Ebbe! Im Gägesatz zu de Junge kenne mir Alte beides. So könne mir verglyyche. Zwüsche früehner und hüt. Us eigener Aaschauig.
Wieso das hüt my Thema isch? Mir hets vor kurzem per Zuefall e vergässe Lied uff e Bildschirm gschneit. En alt Mundart-Lied us mynere Jugedzyt. E Song über myni Dräum als ärnschte, 20-jöhrige Liedermacher.
Und jetz liis i und loos i dä Täggscht, won ich vor knapp 60 Johr als Jüngling gschriibe ha. Und i verglyych: Was het sich gänderet sithär? Wie han ich mi veränderet? Han i hüt no die glyyche Dräum wie dennzmol? Könnt i das gleine Lied hüt no so singe wie früehner? Ohni Wenn und Aber? Oder isch do und dört inzwüsche d Wält nit doch e bitzeli besser worde? Ou ou ou! Ich liis und verglyych.
Do my Täggscht, Johrgang 1969, ohni abschliessende Kommentar:
Ich ha dräumt.
1. Ich ha dräumt letschti Nacht, sonen unwohrschyynlig schöne Draum, do häig ein gschpiilt am Stroosserand und d Schmiir häig ihn in Friide gloo.
2. Ich ha dräumt letschti Nacht, sonen unwohrschyynlig schöne Draum, do häig ein glacht uff offner Strooss und syg kei bitzli bsoffe gsi.
3. Ich ha dräumt letschti Nacht, sonen unwohrschyynlig schöne Draum, do sygi mit em Schätzli amme Sunneplätzli gsi und s häig kei Mensch gha wyt und breit.
4. Ich ha dräumt letschti Nacht, sonen unwohrschyynlig schöne Draum, do häig e Kind verusse gschpiilt und d Mamme heb kei Angscht me gha.
5. Ich ha dräumt letschti Nacht, sonen unwohrschyynlig schöne Draum, do häig in ere Beiz en älters Ehepaar no gschwätzt mitenand, ohni Lämpe z ha.
6. Ich ha dräumt letschti Nacht, do syg nümm Rueh und Ornig gsi, do häigi nümm e Minderheit bestimmt, was d Mehrheit welle müess.
7. Ich ha dräumt letschti Nacht, sonen unwohrschyynlig schöne Draum, do häig e jede gha so vyyl er bruucht, nit weniger, nit meh.
8. Ich ha dräumt letschti Nacht, dä Draum, dä sygi niemols z Änd. Der Wegger het das besser gwüsst. Ich ha dräumt.
(Wärs loose will: www.borninbasel.com)
Aernschd Born wohnt in Reinach. Er ist Songpoet, Autor und Kulturschaffender.

