«Um die siibeni uf em Dorfplatz»

Am Frytig, em 9. Hornig, duen ich, s Hutzgüri, zämme mit em Schärmuuser, em Bott und myne beede Eierwyybli zum drüüedrissigschte Mool in der jüngere Gschicht vo Roteflue es paar Wyybervölcher und Bürschtli im Dorf under dr Rote Flue mi Uffwartig mache. Öbben um die siibeni falle mir ins Dorf y und marschiere ufe Dorfplatz zue. Dört wäi mer emol luege, wär vo dene Roteflüeher, wo nit bsuecht wärde, der Muet het, em Güri under d Auge z drätte.

Als Erschts bsueche mer hüür der Simon Rickenbacher. Är schluurget immer öbbe mit syne Zeeche-Schlarppe zu der ehemoolige Kadaversammelstell aabe. Die het är sich undere Naagel grisse und se vorem Istürze grettet. Dr Schärmuuser het mit de Eierwyybli gwettet, as der Simon no tiefer cha brummle as s Güri.

E Cheer witer obe het s Stebler Gianna d Hütte vom Gottliebruedi selig kauft. Dört will s Güri emol dr Grind in die kameraüberwachti Bougruebe iine ha und luege, wies derzue cho isch, as die Giibelwand säll Mool ufe Ranze gheit isch. Villicht cha si öis dr Boustelle-Fortschritt au no grad im Zytraffer vorfüehre.

Ändlig het der Auf Der Mauer Silvio mit synere Frau jetzt es Huus chöne chaufe, wo die zwöi jetzt mit vill Liebi zur Natur zwäg mache. Dr neu Oberbaselbieter Wasemäischter söll öis grad no sääge, öb mir die gstreckte Chatze in Zuekumft persönlich müesen uf Gälti abe bringe.

Mir gönge d Oberhofgass uf zum Bitterlin Luca – ämel wenn nit grad wider e Sattelschlepper im Wääg stoot. Schön wärs, wenn är neume usere Konkursmasse e Schuehchlopfer chönt bsorge für öis, as nit all d Neegel bi öisne Schueh undenuse gheie. Sie (Menschen aus dem Dorf / Rothenflüher innen und aussen)munkle, as är ame scho vorem Amtsblatt weiss, wo wider eine hopps goht. An de scharfen Yyse vorbi gohts nocher s Chillegängli füüre. S Schaub Ursula söll öis emol verzelle, wie die Bouerei in däm ufgmotzte Chäller vor sich gangen isch. Es Gländer het das Gebäude no obedruf wienes Dampfschiff. Apropos Dampf: Het si ächt jetzt e Heizig? Süscht ghöre mir im Oberloch nit eso vill vom Ursula, es wird öbbe Zyt, as mir ihre emol ufe Zahn fühle.

E chly witer hinde wohne dr Hirschi Daniel und d Sandra. Wos letschte Summer eso heiss gsi isch, isch s Güri scho bold e chly niidisch worden uf ihri Wanne im Garte. Nach 20 Joor under der Flue wohne wärs übrigens öbbe Zyt für es Ämtli im Dorf – im gemeine Root chönte si scho emol e Hirsch(i) bruuche.

Nocher gönge mer zum Dorf us, mir wäi ufem Heiwäg ins Oberloch emol im Humbelsrain zum Rächte go luege, dört bsueche mir der Schneider Beat und s Waldmeier Claudia. Die zwöi häi jetzt gnue vom Buure und häi ihren Umschwung de Chääle-Buure verteilt.

Dr Abschluss mache mir hüür bim Eglin Matthias. Är isch dr erscht Buur, wo scho fertig isch mit der Melioration, schliesslig si sini Ländereie scho alli anenand. Mir wäi go luege, was in der Butig hinde grad füres Projekt am Wachsen isch. Sit Churzem trout sich s Güri wider ins Asp übere
– jetzt, wo die lange Hörner usem Landschaftsbild verschwunde si.

So, das wäre also die Frauen und Manne, wo mir d Ufwartig mache. In der Zwüschezyt sött sich umegsproche ha, as me denn joo nit mit leere Händ sött do stoo, wenn s Hutzgüri chunt. Mit edle rote Säft, Brautem, Brenntem und Gräuktem loot sich s Güri am schnällschte lo besänftige.

Und dir wüsset jo: Öbs huudlet oder Chatze haaglet – s Hutzgüri blyybt immer voruss. Also denn, bis am 9. Hornig, zobe churz nach de siibne.
Hutzgüri & Co.