Ich bi säggsi gsi, bald sibni – e früschbaggenen Erschtklässler. Amme schöne Dag han i vom Papi völlig unerwartet en eleggtrischi Yysebahn bikoo. E gleini, schwarzi Dampfloki (natürlig ohni Dampf), ei Güeterwage, ei Personewage. Trix Express. Toll! Ich weiss no, ass mi Papi äxtra uff vier wyteri Aahängerwääge verzichtet het. Defür hets meh Schiinen und Weiche gä. So hämmer die Gleis kreativ könne mitenand verbinde. Sunsch hätts numme glängt für en eifache Kreis. Ich bi stolz gsi uff mi Papi, ass är das eso super mit em Verkäufer ghändlet het.

I ha vyyl gschpilt mit myneren Yysebahn. Mäng Johr. Ha ganzi Landschafte baut und färngschtüürt mini Zug-Kompositione lo duuresuttere. Mit der Zyt han i wyters Material biko oder in spötere Johr mit mim Sagggäld sälber kauft. Weiche, Wääge, Stroosselampe, Mannsgöggeli, Auteli und bewachti Bahnübergäng mit automatische Barriere. Sogar en eleggtrische Trolley-Bus isch derzue ko. Margge Fleischmaa. Sensationell!

Ich ha Bruggene konstruiert und schwär zuegängligi Tunnel. Ha Hüüsli baschtlet und kunschtvoll e Bärgstrooss verleggt mit ere Hoornoodel-Kurve. My Trolley het der Rangg grad no so gschafft. (Ass ich vyyl spöter sälber e 13-Tönner-Wohnbus fahre wurd, han ich als Bueb nit im Draum dra dänggt.)

Näb ere neue, schweren Elektroloki hän mi aber vor allem die vyyle Liechtli fasziniert. Us de Modällhüüsli-Fänschter hän si uf d Stroosse uuse gschtrahlt. D Krüzige sin zuesätzlig no belüchtet gsi, zem Deil sogar mit Verkehrs-Ample. D Loggene hän Schyynwärfer gha, der Trolley au. I glaub sogar, ass in de Fänschter vo de Personewääge Liechtli glüchtet hän. Denn han i amme zmitts em Dag d Rollläden abegloo und d Vorhäng zuezooge. Derno han i s Liecht glöscht in mym Buebezimmer. Und denn bin i dur d Modäll-Nacht tuggeret als Lokifüehrer und Bus-Chauffeur. My Wält! My Reis! My Nacht-Fahrplan! Im Dunggle hän d Liechter zähmol heller brennt – d Fantasie au – und s Motoregrüsch vo de verbyyfahrende Maschine isch Muusig gsi in mynen Ohre.

Ich ha sogar dangg myner Modäll-Yysebahn eifachi Wohrete erfahren über die ächti Wält. Zem Byschpiil, ass d Züg numme fahre, wenn d Verbindige klappe. Oder anders umme: Kei Verbindig, kei Zug. Nöggschti Regle: Hesch d Weiche falsch gschtellt, entgleist d Loki – oder si rast mitsamt de Wäägen in die falschi Richtig. Oder: Wenn öppis nit hiihaut, isch es my Schuld. Aber au, wenns nochhär wiider lauft. Mi Yysebahnaalaag isch die perfäggti Fahrt gsi ins Läbe vo de Grosse.

Irgendwenn aber han i die letschti Weiche gschtellt gha. Vor Johrzähnte han ich mi Aalaag verpaggt und die Kischte in alle Käller vo all mine Wohnige immer wiider zwüscheglaageret. Bis jetz, vor Kurzem. Jetz han i si verschänggt. Mym Änggel. Är isch säggsi, bald sibni – e früschbaggenen Erschtklässler. Gueti Fahrt, grosse Bueb!

Aernschd Born wohnt in Reinach. Er ist Songpoet, Autor und Kulturschaffender.