D Frau Mosgestei, en alti Bekannti, het mer gschriibe, si syg jetz vo de Kanaren uff d Azore gfloge. Dört heig si s «Instituto Ornitológico» in Ponta Delgada bsuecht. Wie jedes Johr. Der Leiter vo däm Institut, der international bekannt Kanarievogelforscher Prof. Dr. Lourenço Rodrigues, isch nämlig ihri Jugendliebi us Studäntezyte gsi.

Dä Profässer Rodrigues het jo scho 2020 uusegfunde, ass d Kanarievögel uff de Spanische Kanare genau glyych zwitschere wie die uff de Portugiesische Azore. Mit andere Wort: D Kanarievögel hän bereits vor den Ibeerer die zwei Inselgruppene bevölkeret. Und nit umgekehrt! Leider isch die epochali Erkenntnis wäge Corona kuum gwürdigt worde.

Aber eigentlig wötti öppis ganz anders verzelle.

Vor guet fünf Johr isch schreeg gägenüber vom däm besagte Instituto s «International Scientific Center for Beluga Research» uffgange. Wil juscht zu däm Zytpunggt d Frau Mosgestei bi ihrem Lourenço z Bsuech gsi isch, sin die beide zämmen an d Vernissage gange. Aber oh jeh!

D Leitere vo däm neue Walforschigs-Center isch die attraggtivi, hochintelligänti, aber hinterhältigi Valeria López-Martínez gsi. Kei Wunder, isch dä Kanarievogelforscher vo schreeg gägenüber däre Dame voll in d Falle gloffe. Aber voll!

Kurz und nit so guet – dä Portugiis und die Spaniere hän ihri Forschige bezüglig Walgsäng und Kanarie-Gezwitscher zämmeglegt. Mit Erfolg! D Beluga-Wal wärde jo bekanntlig als «Kanarievögel vo de Wältmeer» bezeichnet. Wemme nämlig d Beluga-Stimmen um siiben Oggtaven uffeschrubt, vernimmt s menschligen Ohr dütlig s kanariehafte Schnalze, Rüsslen und Zwitschere vo däne Meeres-Monschter. Trotzdäm verschtoht natürlig bis hüt e kei Mensch, was son e Beluga tatsächlig seit.

Die yyfersüchtigi Frau Mosgestei het mer spöter verzellt, si heig em Lourenço vorgschlage, s Glyyche mit de Kanarievögel z mache. Eifach umgekehrt. Är soll mol d Kanarien-Arien e paar Oggtaven aabe schruube.

Das het er au gmacht, aber ebbe zämme mit däre Valeria. Die hän ändlos tüftlet, bis si mit Unterwasser-Lutsprächer d Kanarie-Gsäng in de tiefschte Bäss de Belugas vorgspiilt hän. Glyychzytig hän si mit em uffetrimmte Beluga-Sopran d Kanarievögel beschallt. Beides in Ächtzyt. Hin und här. Digital.

S Resultat vo däm Experimänt: Fantastisch! D Kanarien und d Belugas verschtöhn sich sidder beschtens und plauderen und turtle rund um d Uhr mitenand. So het das Forscherpäärli bim Turtlen uusegfunde, ass es vor 150 Millione Johr ei universelli Ursprooch gä het, wo numme d Tier verstöhn.

Wohär i das weiss? Erschtens: D Frau Mosgestei hets mer verrote. Us Raach. Und zweitens: Ich ha die ganzi Gschicht sälber zämmefabuliert. Si stimmt vo vorne bis hinde nit. Sorry! Aber so han i hüt der Fantasie e gleine Vorsprung verschafft gägenüber der Realität vom Alltag. Wenigschtens für e paar Augebligg.

Aernschd Born wohnt in Reinach. Er ist Songpoet, Autor und Kulturschaffender.