Vor füfzg Joor, me glaubts fascht nid, wogt eusi Gmein es Fescht, es wird zum Hit.
S nechscht Joor, hed me beschlosse do bi eus, gits wider öppis ähnlichs, öppis neus.

Überal i Schüüre, Schöpf und Garte, wird plant und bout, me chas jo chum erwarte.
S Motto vo däm Fescht, wo mir jetz plane:
«Z Oltige rollts so richtig»; nundefahne.

Glyych blyybe d Ständ, so wie am Märt, das sy eus eusi Standbetryyber sicher wärt. Sid Moned wird i ville Schüüre plant und au skizziert, es wärde olti Böde usegrisse, Balke früsch fixiert.

Do und dört wird au a Chugelebahne gschafft, me will halt luege, dass alls zämepasst. Sömli wärde jetz i Bode drückt, dass s nechscht Joor d Dekoration entzückt, wenns denn grüent und d Blueme spriesse, mues me nume alles giesse.

S wird gmolt und putzt, ufgrumt wird au, jä s OK nimmt das alles sehr genau. Jetz hoffe mir uf Wätterglück im Mai, und freue ys uf Euch als Gäscht bi eus dehei.

vo Oltige der Mundi