Solang mi bsinn, isch mer d Freiheit am wichtigschte gsi. Scho as Chind ha mi zu nüt lo zwinge. Renitänt isch dä Bueb, folgt nüt, macht numme, was är will, hets scho früeh gheisse. Spööter singt der Freddie Mercury zur Bestätigung «I want to break free»! Yeah, genau das mach I jo ständig, han I dänkt.

Bis letschti, won I bitter muess yygsee, ass mi über langi Joor tüscht ha, was my
Freiheit und Unabhängigkeit aagoot.

Um d Oschteren umme han I in dere Rubrik vom mym bööse Lungeninfekt verzellt. Dört häi mi d Ärzt au gfroggt, öbb I rauch. Und i ha müesse zuegee, jo, e Päckli am Taag. Do häi sii mit den Aggsle zuckt in ihre wysse Chittel und gsäit: «Herr Schneider, denn gseje mer is sicher no öbbe do. Mir vermuete, Sii häi e COPD!»

COPD, dasch die chronisch Verängig vo den Ootemwäg, schlyychend, zerstörerisch. Die chunnt hauptsächlich vom Rauchen und macht d Lungen enorm aafellig für alles, wo sii viral oder bakteriell cha yyfoo.

Dasch der Schuss vor e Bug gsi, dasch aacho, das han I kapiert! Und ändlig gsäit:
«Nei, so chasch nümm wytermache, jetz muess Schluss sy dermit, jetz hörsch uf!»
Aber längt ächt der eige Wille gege d Sucht?
S het jo scho früehner nie klappt.

Drum mäld I mi zur mentale Unterstützig z Sissach bim ne Hypnosespezialischt zur Therapie aa. Wemme sich nämmlig voll druf yyloot, cha me mit Hypnose uralti Verhaltensmuschter umprogrammiere. Dasch genau das, won I will und bruuch! Also los:

In der Hypnose lueg I mi plötzlig vo usse här aa. I gsee, wien I im Alltag folgsam immer die glyche Rauchgwohneten und Ritual absolvier. Wien e Dotteli! Wil d Zigeretten isch jo immer verfüegbar, und in jedi Lucke passt no schnäll eini yyne: zur Zytig, bim Kaffi, bim Päusli am Bürofänschter, im Auti, bim Warten ufs Trämli, bim Füüroobebierli, ständig isch sii do und verlangt Ufmerksamkeit. Sii isch Luscht, Bedürfnis, Beloonig und Befriidigungsritual in eim, won I in immer chürzeren Abständ ewigs wiider neu muess erledige. Villmol scho uf Vorroot. Zwanghaft, öbb I will oder nit, dasch normal und scho lengschtens egal!

I gsee, I bi nüt as e Sklav und gar kei freye Geischt. Nummen e Sklav stoot freywillig uf Bahnhöf in gääl markierti Zone, hockt uf Flugplätz in stinkigi Lounges, stoot vor Restaurants im Rääge duss uf der Stroos. Nummen e Chnächt lot sich so lo erniidrige zwänzg Mol jede Taag. Dasch puri Underwärfig, won I do praktizier. Und dermit s gnaue Gegeteil vo Freiheit.

In der Hypnose muess I plötzlig lache, so chindisch und verblöödet chunnts mer vor, ass I mir vo der Sucht nach der Zigerette sit Joore jede Tag vom Läbe lo lo duretakten und frömdbestimme. Das darf doch nit sy! I WANT TO BREAK FREE!

Sithär isch Schluss, Nulltoleranz, nikotinfrey sit drey Mönet. Und falls emol e Schwechi chiem, han I myni Liebschte instruiert: «Sett I Duubel wiider mol afo rauche, no schiesset mer grad fuuli Eier und Tomate nooch, I hätt s verdient!»

Florian Schneider wurde 1959 geboren und stammt aus Reigoldswil. Er ist Sänger, Schauspieler und Liederschreiber und lebt mit Tochter Mina in Eptingen.