Und jetz simmer in der Halbzyt. In der Halbzyt vom Johr 2026. Jetz chönne mer churz dureschnuufe, e Trinkpause mache, und mol zrugg luege, wie die erschti Helfti eso verloffen isch. Aso ufpasse, i würd säge, mir fönge grad aa, hebet euch fescht:

Im 2026 sehne sich d Mensche nach ere Feelgood-Story – und luege denn am ene Waal bym Stärbe zue. E sone massigs Event, das wünscht sich au der Infantino. Är organisiert die gröschti WM, wos je gee het. Und zwar bim gröschte Friidensstifter vo der Gegewart. Für Liechtblick sorgt dä vor allem mit Bombe. Die altbekannti Zitrusfrucht im Oval Office macht wiider Theater. E mega Maga-Zirkus. S gröscht Kunscht-Stückli vom orange König: Lüge! Das macht är virtuoser as jedi Künschtlichi Intelligänz. Uf em Bürgestock wird au in däm Johr kei Friidensgipfel bache. Und bim G7-Gipfel entstoot nid viil meh as heissi Luft.

Apropos heissi Luft: In der Schwyz beschäftigt me sich us guete Gründ gröber mit Brandschutz. Au s Theater im Pfarrhuus-Chäller z Waldeburg gspüürt das – und muess per sofort d Türe schliesse. S Theater-Team lot sich aber nid d Finger verbrenne, und organisiert zum Glück au in Zuekunft Live-Kultur in regionale Rüüm.

Apropos Zuekunft: In der Schwyz wird d «Serafe» nid halbiert. Derfür wird s Volch gschpalte. Das behaupten ämmel verschiideni Parteie. Vor allem die Einti. S SVP-Sünneli luegt finschter uf d Stedt, wo Temperature prompt in unheimligi Hööchene styyge. Gege die schlimmi Hitz hilft wahrschynlig au nid d Sunne-Finschternis, wo eus im Auguscht erwartet. Begeischtere duet die Finschternis trotzdäm. Und zwar wyt über 10 Millione Mensche. Aber nid numme d Sunnen entdeckt the dark side of the moon, au der Mensch umrundet der Mond.

Apropos Rund: Rund laufts an der Winterolympiade – d Schwyz het 23 Medallien abgstaubt. Dasch e Rekord!

Apropos Gold: Euses chlyne Land isch numme neutral, wils nid weiss, uf weler Syte der Chuck Norris stoht. Aber söttigi Chuck Norris Witz sy Gschicht. Der Chuck Norris isch im März gstorbe. Süscht hät är dä Waal sicher eigehändig zrugg ins Meer träit.

Apropos Meer: Der Meeresspiegel styygt rasant, d Gleschter schmelze schnäller as der Odermatt s Lauberhorn durab fäzt, und Züri wird vomen Unwätter zämmebrätscht. Trotzdäm entscheidet me sich im Baselbiet nid für die grüeni Politik im Regierigsroot, sondern nimmt der Klima-Wandel uf die Liechti Schultere. Der Zivildienscht wird abbout, AKWs wärden ufbout und Trinkpause wärden yybout.

Apropos Halbzyt: I wünsch e gueti Zweiti – aber zerscht e schattigi Summerpause. Trinke Si gnueg und mache Sis guet.

Dominik Muheim ist in Reigoldswil aufgewachsen und lebt in Liestal. Er ist freischaffender Kabarettist und Slam-Poet. Er gewann 2017 den Baselbieter Kulturpreis und war 2024 Träger des «Salzburger Stiers».