My Rollträbbe-Dilemma

Ich stand ellei vor ere Rollträbben und han e Problem. S Problem isch nit d Rollträbben an und für sich. S Problem isch die betonierti Stäge näbedra. Wellen Uffschtig nimmi jetz?

Klar, Betonstäge sin gsünder. Sälber laufe macht fit. Wenn aber die Rollträppe näbedra läär vor sich ane rollt und rollt und rollt, isch das jo au total dernäbe. Das isch doch en absolut sinnlosi Energieverschwändig! E Rollträbbe macht numme Sinn, wemme si benützt. Erscht dur mii verwandlet sich die sinnlosi in e sinnvolli Energieverschwändig.

Also nomol: Welli Stäge nimm i jetz mit guetem Gwüsse? Die beide Uffstiigs-Optione stürze mi in en ächt Dilemma.

Grundsätzlig isch e Rollträbbe jo öbbis Genials. Vor allem bärguff. Si bietet eim Stuefe für Stuefe für Stuefen e stuefelosen Uffschtiig. Und wenn denn die Stägetritt ooben aakoo sin, verschwinde si – Tritt für Tritt – vor unseren Auge, wie vom Ärdbode verschluggd. Und denn gohts unterirdisch wiider bärgab. Unsichtbar. Ändlos. Und kuum isch son e Stuefen unden aakoo, foot das ganze Theater wiider vo vornen aa. En unändligi Gschicht, wo mir achtlos mit Füesse träte.

Wie gsäit, Rollträbbe sin genial. Muesch eifach uffpassen, ass nit stolperisch. Das gäb e heillos Duurenand mit Domino-Effäggt. Egal, obs obsi goht oder z durab. Uffpasse muesch natürlig bim Uffefahren au, ass de nit mit däne zämmeputschisch, wo sich uff der Überholspur befinde. Wo an dir verby noch oobe drängele. Also d Undenuffe-Sträber. D Emporkömmling. D Rugge-Schubbser. Oder die notorisch Verschpötete. Und denn kömme si jedes Mol au no ruggsichtslos vo hinde! Hinterruggs!! Bin i Ruggspiegel oder wass??!!

Und denn bisch uff z mol – werum au immer – plötzlig wyt, wyt ewägg vo do und völlig neumen anders mit dyne Gedangge. Wandlisch ganz ellei mit dir dur Ruum und Zyt. Wöttsch eifach ei Etage höcher und betrittsch, wie färngschtüürt, die nöggscht liigendi Rollträbbe.

Aber scho noch den erschte Tritt merggsch, do stimmt öbbis nit. Zwor kunnt dir e jedi Stuefe fründlig entgäge. Sogar die ganzi Stäge kunnt dir entgägekommend entgäge. Aber s isch wie im richtige Läbe. Wenn dir uff eimol alles entgägekunnt, isch Vorsicht bote. Denn denn bisch entweder e Geischterfahrer oder du hächlisch e Stägen uff, wo aabe rollt. Wie im richtige Läbe.

Sobald du stoh blybsch zem Verschnuufe, zieht s di wiider bärgab. Du stygsch nur uff, wenn du schnäller bärguff trittsch als d Stägetritt vo oobe noch aabe rolle. Und je meh dyni Kondition noche losst – also je schnäller du langsamer wirsch – deschto rascher folge Tritt um Tritt. Bikunnsch ei Tritt noch em andere verpasst, bis uss em Tritt gheisch. Ebbe, wie im richtige Läbe.

Und wie im richtige Läbe stand i no immer do und ka mi nit entscheide. Nimm i jetz d Rollträbben oder doch lieber die Stägen us Stei? Kai Problem! Ich nimm der Lift.

Aernschd Born wohnt in Reinach. Er ist Songpoet, Autor und Kulturschaffender.