Chiirssi – what else?

Am Fryttig wird men informiert,
was obschtbou-meessig Nöis passiert.
Me liist vo Träum, vo Visione
und Sache, wo sich zletscht nit lohne.

Will‘s mit «Viagra-Beeri» nüt syg,
chunnt d Chiirssi-Aprikose-Chrüzig.
Die isch no nit der grossi Hit –
s Wätter spiilt halt gar nie mit.

Grossi Hoffnig will me jetze
uf e Chiirssi-Sorte setze:
Die syg spööter ryf – und drum
chönnt d Chiirssizyt im Minimum

fascht zwee Wuche lenger duure.
Y hoff halt nume, ass de Buure,
wo Obscht und Frücht doo produziere,
nit immer wider wird passiere,

ass d Grossvertäiler au grad denn
mit Aktione wärbe, wenn
früschi, gueti Waar vo doo
in de Regal sött zvorderscht stoh.

Dumm isch doch, dass «importiert»
sich trotz de lange Wääg rändiert.

Äigebröödler