E Johrhundert-Kolumne

Ei ei ei! Do kunnt wiider e geballti Ladig Oschteren uff is zue. Wie jedes Johr an Oschtere. Über das Wuchenändi durläbe mer aber non e wyteri Konstellation, wos esoo so schnäll nümmi git. Am jetzigen Oschtersunntig kunnt nämmlig no d Umstellig uff d Summerzyt derzue. Und das isch nonig alles. Am nöggschte Dag schneits is erscht no der Erscht April ins Huus. Am Oschtermäntig ploogen is also au no all die sauglatte Humorischte, wo s Johr dur e kei Spass verstöhn.
Ei ei ei, han i dänggt, dasch jetz emol en eimoligi Steilvorlag für e Kolumne! Do kan ich thematisch voll us em Volle schöpfe. Universum, Religion und harti Eier! Johreszyte, Oschterbrüüch und Schadefreud! Alles trifft uff alles. Das schreit jo förmlig noch eme Füürwärgg vo träffsichere Geischtesblitz. Die Oschter-Kolumne isch e Gschängg vom Himmel. Die dörf i uff kei Fall vermassle. En ächti Herusforderig. Drum gang i das Mol sehr struggturiert vor. Ich frog mi als Erschts: Mit was fang i aa? Klar! Punggt eins: Bürotisch uffrume! Denn kunnt Punggt zwei: recherchiere, oder uff Dütsch: google!
Do myni googlete Resultat: Die letscht Summerzyt-Umstellig an Oschtere, plus 1. April am Oschtermäntig, hämmer 2013 gha. Die glych Konstellation kunnt, falls i richtig grächnet ha, s nöggscht Mol erscht wiider anno 2086.
Ich will mym Schiggsal jetz nit vorgryffe, aber i gang emol dervo us, ass ich das nit wird erläbe. Also bikumm ich do und jetz die absolut eimolig Chance, e Johrhundert-Oschter-Kolumne z schrybe. Mit däre literarische Lascht uff de Schultere suech i mol der Aafang, wo jo immer so schwär isch.
Am Beschte fang i eifach aa mit emen eifachen Ei. Vo Natur us glycht jo ei Ei em andere, wie ei Ei em andere. Erscht dur s Bemole wird s Ei zum kulturellen Individuum, also zum unverwäggselbaren Oschter-Ei. Ei-molig dur d Ei-Bemolig! Sooo schööön!
Aber was mache mir Mensche dermit? Mir tütsche die Kunschtobjäggt kaputt, zerschtöre muetwillig die Meischterwärgg und verschlinge, falls mir keini Veganer sin, der Inhalt vom Oschter-Ei mit Salz und Mayonnaise.
Typisch Mensch! Bikunnt er e Perle, gheit er si vor d Säu. Bikunnt er e Titanic, fahrt er si voll an d Ysbärgwand. Bikunnt er en eimolig paradisische Planet, naglet er en ans Krüz. Der Mensch isch Meischter im Vermassle. Är verpfuscht massewys eimoligi Glägeheite. Das kenn i vo mir sälber. Ich bi jo au nur e Mensch.
Und so land i wiider bi mynere Kolumne. Der Aafang wär gschafft. Super! Aber jetz fählt mer dummerwys der Platz für der Räscht vom Täggscht. Und scho han i wiider e Chance verboggt. Guet, ich könnt natürlig d Volggstimm-Redaggtion froge, ob si mir für my Johrhundert-Oschter-Kolumne könnt der Termin vom 28.3.2086 freihalte. So hätt i wenigschtens e Weneli meh Zyt zem schrybe. Uff all Fäll fang i sicherheitshalber jetz scho mol aa mit hirne.

Aernschd Born wohnt in Reinach. Er ist Songpoet, Autor und Kulturschaffender.