S erscht Mol Flohmi

I sägs nit gärn, aber es isch halt esoo: Mir lääben im Überfluss. Mir häi vo allem gnue oder sogar z vill. Usser villicht Gelasseheit und Gäld – aber das isch es anders Thema. Z vill Spiilsache, Schueh und Chleider häi mer uf jeede Fall in eusem Huus. Also zwöi Föiftel vo euserer Familie gsäie das esoo. Die andere drüü Föiftel nit – dorum häi mir au immer wiider, nenne mirs emol «aagregti Diskussione», wenns ums Thema Ufruume goot. Eusi Chinder chönne sich nit eso guet vo Sache trenne. Allwä het das echly mit ihre Gen z due. Ei Helfti vo ihrnen Öltere gheit au nit eso gärn Sache furt – me chönnts jo mol no bruuche. Oder es chönnts no öbber anders bruuche. Und wenn is furtghei, vermiss is ganz sicher morn scho. Ämmel sicher ischs vill z schaad zum furtgheie. Und überhaupt regt mi die Wägwärfgsellschaft scho lang uf. Jo öbben esoo lauft das bi mir. Und esoo goots eusne Chinder bim Ufruumen und Ussortiere vo ihrne Spiilsachen au. Es guubti do scho non en anderi, eifacheri Löösig: Äifach ufruumen und furtgheie, wenns d Chinder nit merke – und si würdes würkli allwä nit merke, usser si entdecken öbbis im Abfall wiider. Aber i gibs zue, ich mach das gaar nit gärn. Es sy schliesslig ihri Sache. Und ich has au nit gärn, wenn öbber heimlig myni Sache furtgheit.

Uf jeede Fall isch die Usschryybig für e Chinderflohmi im Dorf grad rächt choo. «Äntlig wärde mir emol es paar Sache los», hani innerlig frohlockt, woni eus reschpektive eusi Meitli an dä Flohmi aagmäldet ha. D Chinder häi sich würkli druf gfreut, Sache go verchaufe. Mit em Ussortieren ischs allerdings ehnder zeech gange. Vo de Buschispiilsache, vo dene häi sich alli drüü guet chönne trenne. Aber weder vo de gfühlt 100 Playmobil- und Schleichrössli no vo de gfühlt tuusig Stofftierli het eis furt dörfe. Immerhin häi mer denn doch non e Bollerwaage chönne fülle mit allerlei Sache: Puzzle, Büechli, Kassettli, es Chindervelo und e Bobby Car sy au no mitcho – und etligi Paar überzähligi Schueh. «Die chönne mer jo immer no em ‹offnig Chleiderchaschte› vermache, wenn se niemer will chaufe», hani dänkt. Ohni z vill wölle vorgryffe: Esoo ischs au use choo.

Aagfange het dä Flohmi im Innehof vo der Obere Mühli am letschte Sunntig bi beschtem Wätter super: Es isch nonig emol ölfi gsi, do sy scho die erschte zwöi Kassettli und s erscht Büechli verchauft gsi: die würklige Schnäppli wärden amene Flohmi schliesslig am Aafang gmacht. Nocher sy eusi Chinder allerdings meh am Chaufen as am Verchaufen intressiert gsi. Aber i will jetz do nit z fescht jommere: under em Strich ischs ganz e tollen Aalass gsi und d Chinder häis guet gha. Das isch doch d Hauptsach.

Drü Stund spöter sy mir übrigens es Playmobilschloss, 2 Büechli, es Spiili (ok, i gibs zue, das han ich kauft), zwöi Paar neui Hose (au vo mir kauft), es Barbie-Ross, zwöi schöni Stei und es Armband ryycher s Dorf duruf zottlet. Wenigschtens het alles im Bollerwaage Platz gha.

Stefanie Spycher-Gass (38) ist ehemalige Redaktorin der «Volksstimme», Mutter von drei Töchtern und bewirtschaftet heute mit ihrem Mann einen
Bio-Bauernhof in Oltingen.

MUNDART

Image Title

Möchten Sie weiterlesen?

Ja. Ich bin Abonnent.

Ja. Ich benötige ein Abo.

Article

Image Title