Hutzgüri unterwegs im Dorf

Die ganz Hutzgüri-Mannschaft isch zfriede gsi, wo si letscht Johr mit volle Hutte in dr Höhli aacho si. Au froh, ass dä Rundgang ohni grosse Schade über d’Bühni isch, und glücklich, dass s’Läbe doch so nodisno wieder normal wird. Doch was heisst scho normal? Denn chuum isch alles in dr Vorrotschammere versorgt gsi und s’Hutzgüri zfriede in sim Näscht, het dr Bott d’Mäldig us em Dorf brocht, d’Zuekunft wärd dunkel. Es gäb e Mangel an Energie, Gas, Strom, Öl. Dr Bundesroot het ufgruefe zum Spare. Das heisst, numme no das bruuche, wo wirklich nötig isch: Liecht lösche, nümm bade, numme no z’zwöit dusche und d’Heizig zrguggdräije. Do hei die Eierwyybli gloost und gfrogt, wo si no meh sölle spare. Die paar Cherze, wo si underem Johr bruuche zum z’hinderscht in dr Höhli chli öpis z’gseh, mache d’Suppe sicher nit feiss. Und ufs Bade verzichte? Das einte Mol im Johr, wo si yfüüre zum s‘Badwasser heiss mache, sett scho no dinne ligge. Zäme dusche, das wer jo scho no guet. Si hei sich scho vorgstellt, wies isch mit em Bott, im Veehdokter oder im Schärmuuser zäme under dr Duschi z’stoh und sich yzseife. Aber ebbe, für das müesste si jo zerscht e Duschi ha. Jetzt isch no s’Heize. Wo selle si do spare? In dr Höhli hets konstant johry, johrus 9 Grad. Es bizeli Wärmi chunt vom Härd. Wenn si im Hützgüüri es ungrads Mol es Süppli choche, strahlts vo däm chli Wärmi ab. Also zum öpis chöne yspare si si die Falsche. Die Energie-Krise und die Mangellag betrifft si definitiv nit. Wo si aber e Mangel hei, isch bi de Vorröt. S’Hutzgüri hei si rächt müesse uffuehre nach dene zwöi Johr. Drum muess Nöis ane. Am Dunschtig, 23. Hornig, wird drum bi folgende Lüt Halt gmacht:

Claude Vuille, künschtlerisch begabte Fotograf. s’Hutzgüri freut sich scho uf es nöis Passfotteli.

Tea Virolainen, Grafikerin, Kunschtsachverständigi, im blaue Huus dehei.

Rolf Tschan, sälbschternannte Fasnechtsprofi mitere komplette Blagettesammlig, hoffentlig hüt Zobe emol z’Sissech.

Moritz Kamber, ehemalige Hockey- und Fuessball-Amateur-Spitzespiiler, Expärte in allem, dasch kei Witz.

Tanja Wenger, Gmeinischrybere im öschtliche Nochberdorf. Vo eusem Bsuech wei mir es amtlich unterschrybenigs Protokoll.

Bea Rösli, Tennisprinzässli mit häfelfingerischer Abstammig, Näbegrüsch oder au s’Beeri vome aktive Gmeinrot.

Ruedi Graf, Kunschti-Fachmaa mit chlyyner Thurgauer Hals-Chranked, Esaf-OK-Mitglied mit grossem Defizit.

Sibylle Heid, Spaziergängere, Stromzellerabläsere. Die eint oder ander Yoga-Üebig will s’Hutzgüri denn scho gseh. Ab de siebne isch s’Hutzgüri unter Strom. D’Eierwyybli wärde hüür nit luggloh, bis gnue in ihrne Hutte isch. Sett das nit dr Fall sy, hei si adroht, abzhocke und sich aazchläbe. So wyt muess es nit cho. Drum styyget in Wychäller abe und chläderet in d’Räucherchammere ufe. Holet e feine Tropfe vüüre und e guet abghangeni Syte Späck. Mir hei chräftigi Eierwyybli!

Dr Schärmuuser

Hutzgüri Sissach, Donnerstag, 23. Februar, ab 19 Uhr, Sissach.