Das Hutzgüri geht morgen Abend um

Am Frytig, em 10. Hornig, duen ich, s Hutzgüri, zämme mit em Schärmuuser, em Bott und myne beede Äierwyybli zum zwöiedrissigschte Mool in der jüngere Gschicht vo Rotheflue es paar Wyybervölcher und Bürschtli im Dorf under dr Rote Flue mi Uffwartig mache. Öbben um die siebeni falle mir vom Weschte häär ins Dorf y und marschiere schnuerstraks ufe Dorfplatz zue. Dört wäi mer emol luege, wär vo dene Rotheflüeher, wo nit bsuecht wärde, der Muet het, em Güri under d Auge z drätte.

Nochär goots numen e Chatzesprung wyter abe zum Spielplatz vo de Red Rocks. Sit däm myschteriöse Öl-Unfall laufts dene Seniore uf Rollschueh wie gschmiert. Sie häi dörfen ihre gröscht Erfolg in der Vereinsgschicht heischleike und häi dä Schwyzermeischtertitel derewäg füecht-fröhlich gfyyret, as d Gmein grad dr Altglas-Container dört abe züüglet het.

Witer goots zum Buser Uwe in d Oberhof-Gass grad näbe der Chille. Vo ihm ghört und gseet me nit eso vill und dorum kennen ihn vill gaar nit. Dorum isch’s jetz Zyt, as s Güri einisch verbi chunt und frogt, was är eigentlig joohryy und joohruus eso macht.

Bim Theo Buess häi mir dr Bärgpriis erreicht vo dr hüürige Heische-Rundi. Apropo Bärg: Ufem Rotheflüeher Bärg gsäie mir der Theo und s Vreni regelmässig uf Wanderschaft. Und wenn er nit grad am Wanderen isch, renoviert er flissig sys Huus.

Denn simmer bim Sör Gianni Mazzucchelli z Gascht. Ihm chunt e bsunderi Ehr zue, är isch vom gemeine Root zum Ehrebürger ernennt worde. Drum het är au die sälteni Ehr, vom Güri nomol bsuecht z wärde. Är cha eus e mängs verzelle als Lokalhistoriker.

Wills au bim Hutzgüri e Frauequote git, isch die Nögschti uf der Lischte es Wyybervolch. Jo Claudia Mörikofer, du hesch richtig glääse: Jetzt chöme mir au emol zu dir cho heische. Do letschti sigsch gruusig umgheit, zwee Chnoche heigsch der broche. Mir wäi luege, wie guet as das wider versuured isch.

Grad nomol e Frau bsueche mir an der Wittnauer Stross. S Stahl Bet- tina chunt bold neui Nochbere über – oder besser gseit olti Nochbere. Mir hoffe, as ufem neue Cheesi-Wägli denn au wider Ornig isch, wenn mir aaztraabe chöme.

Dr Zwöitletscht uf eusere Lischte isch dr Gerster Simon. Zäme mit syne Gompanions het er sich s Olga-Huus undere Naagel grisse. Allergattlig Lüt het er in däm Huus mit schier duusig Zimmer mittlerwyle unterbrocht. Isch ächt bim Ruume vo däm Fläschedepot no neumen e Guttere Brämenöl fürecho, wo mer chönte bruuche zum im Summer s Güri iriibe?

S Zimberhanse Pauli, wo mir zletscht bsueche, het sich e stattliche Gritteschlepper poschtet. Es nimmt eus scho no wunder, was denn dä «Black Pauli»-Schriftzuug uf däm Laschtwägeli z bedüte het und öb dä Charre scho mit Villiger usgröichered isch. Dr Rotheflüeher Rundballekönig sig schyynts früehbangsioniert. Zu dere Jooreszyt wird aber wohl niene meh es unprässts Heumäädli umeligge, eso as mir bi ihm none zünftige Heigo-Schluck chöne nee, bevor mir wider in der Dunkelheit verschwinde.

So, das wäre also die Frauen und Manne, wo mir d Ufwartig mache. In der Zwüschezyt sött sich umegsproche ha, as me denn joo nit mit leere Händ sött do stoo, wenn s Hutzgüri chunt. Mit edle rote Säft, Brautem, Brenntem und Gräuktem loot sich s Güri am schnällschte lo besänftige.

Und wär die ganzi Wohret will wüsse, chunt wie immer am beschte grad persönlig mit uf d Heische-Rundi durs Dorf.

Und dir wüsset jo: Öbs huudlet oder Chatze haaglet – s Hutzgüri blyybt immer voruss. Also denn, bis am 10. Hornig, zobe churz nach de siebne.

Hutzgüri & Co