Die hütigi Zyt

Do hani geschter en alte Kolleeg aatroffe. «Hesch Zyt für e Kaffi?», han en gfrogt. «Ou, sorry», het er zur Antwort gää, «ha jetz denn grad e Termin.» Und scho isch er wiider wyter. Schad.

«Aber ebbe», han i dänggd, «irgendwie passt my Kolleeg in die hütigi Zyt.» In der hütige Zyt isch es e Zyterschyynig, keini z ha. Wär hüt no Zyt het, passt eifach nümm in die hütigi Zyt. Wär hüt no Zyt het, isch vo geschter. In der hütige Zyt hesch kei Zyt, hüt hesch Termin.

Eigetlig isch es simpel. Hesch Termin, hesch Erfolg. Hesch Erfolg, hesch kei Zyt. Oder andersumme: Je meh Zyt eine het, deschto erfolgloser kunnt er derhär. Wär hüt no Zyt het, isch e Versaager. Us däm Grund wird in der hütige Zyt die hütigi Zyt zerstört, wo s numme goht, für ass mir denn als erfolgsorientierti Zytgenosse stolz könne sage: «Sorry, kei Zyt.»

Am beschte zerstörsch dy Zyt mit Termin. Termin sin optimali Zyt-Killer. Termin frässe sich in d Zyt, wie mynes Wüssens Termite in afrikanischi Pfahlbauersiidlige. Die Termite verbysse sich in d Pföhl und no bevor si ooben aakoo sin, hän si si verschlunge. Die Pfahlbauersiidlige tätschen oobenaaben und vergrabe die arme Termite unter sich. E paar Termite aber überläbe rundummen und frässen aaschliessend der Räscht vo der Siidlig ratzekahl uff.

Genau eso maches Termin mit der Zyt. Die Termin frässe sich die Süülediagramm zderuff und no bevor si ooben aakoo sin, hän si si verschlunge. Die ganze Zytgebäude krachen in sich zämmen und begrabe die arme Termin unter sich. E paar Termin aber überläbe rundummen und frässen aaschliessend der Räschte vo der Zyt ratzekahl uff. Und scho kunnt der Terminbsitzer, genannt «Terminator», ummen Eggen und verkündet stolz: «Sorry, kei Zyt.»

Vor Johre scho het der Terminator mit syne Film Millione vo Dollar inveschtiert, zum Zyt z totschloo. Aber d Zyt räächt sich. Bis jetz het d Zyt no jede gschafft. Es wird au immer wie schwiiriger, d Zyt in Griff z kriege. Si segglet uns je lenger, je schnäller dervo.

Das isch sowieso e Phänomen mit däre Zytbeschleunigung. Jetz hämmer doch grad erscht 1. Auguscht gfyyrt und schwubbdiwubb isch bereits wiider erschten Advänt. Au d Wiehnacht stoht jedes Johr mindeschtens zwei Wuche z früeh vor der Türe. Drum müen mir alli so hetze. Es git sogar Lyt, die froge sich, werum in aller Wält das Buschi inder Krippe exakt zur Wiehnachtszyt het müessen uf d Wält ko, wos doch eh scho so stressig isch. Und scho drängele wiider d Schoggi-Oschterhasen in d Regal.

Jo guet, mi wunderets nit. Je schnäller mir in der hütige Zyt der hütige Zyt noochejage, zum si z totschloo, deschto schnäller jagt si dervo. Wurd ich ämmel au so mache. Mir könnte villicht emol drüber noochedängge, wemmer Zyt hätte. Hejo, werum traktandiere mir dä Punkt nit eifach für e nöggschti Sitzig? Ich bi überzügt: Do finde mir sicher e Termin.

Aernschd Born wohnt in Reinach. Er ist Songpoet, Autor und Kulturschaffender.