Alts Gwärb

Letscht Wuche – s isch fascht 1. April –
han y vermuetet: «Ou, do will
ys allwääg äin zum Naare haa!»
Denn merk y: Ah, näi, allem aa

isch es ärnscht – ab sofort cha me
nid in d Bäiz, doch gwüssi Dame
dörfen ihri Chundschaft – Manne –
wider ganz legal «entspanne».

Me froggt sich und me diskutiert,
worum grad daas Gwärb profitiert.
Dä Wirtschaftszwyyg müess allem aa
e prominänti Lobby haa.

Emänd het au der Umstand gnützt,
ass me sich jo in däm Fall schützt.
Wobyy – was y ergänze sett –
me nit primär vo Maske redt …

Äigebröödler