Trotz abgesagter Schnitzelbankabenden haben uns auf Anfrage einige Verse erreicht

Büchel-Rueche, Zunzge

2020 hasst mä dr Coronavirus und das us guetem Grund.
Dr Mohrechopf heisst jetz Schaumgebäck mit Migrationshintergrund
und d Klimajugend het uf em Bundesplatz protestiert.
D Buurä und diä andere Bürger si sehr frustriert.
Mir nämes zur Kenntnis äs isch halt ä so wiä’s jetz isch.
S isch immer no besser, als wenn d ä Sissacher bisch.

Jä mir si Büchel-Rueche und blibä unverschrockä.
Mir wärde d Fasnacht 2022 ganz sicher wieder rockä.

Dr Farblosi, Sissech

Dr Fabrlosi wandte sich am Montag pünktlich zum Start des sonstigen Sissacher Schnitzelbankabends per Smartphone-Video an das in die eigenen Stuben verbannte Publikum.

Zerscht will i zur Info die neuschti Zahl erwähne:
2711 dehei in Quarantäne
Das nume do z Sissech, unglaublich, doch s isch Fakt.
Si alli het sit gescht zmidag der Fasnachtsvirus packt
30 Johr farblos, das hät i mit euch welle fyyre
letscht johr. Doch es git kei Fasnecht, s isch nüt mit  jubiliere.
Au hüür isch nüt, es brucht Geduld. Wie lang mues i ächt warte?
I hoff, dass i nid erscht am 50. wider darf starte.

Käi Chopfweh me, käi Maagebrenne, nie meh ein im Gool.
Sit i s «Farnsburger» nüm mues suffe, jee wie isch mir wohl.
S letscht Bier wird brennt zu Alkohol, so nimmt die Gschicht ihr Änd.
Was no blybt, sy leeri Chischte – und Usschlaag an de Händ.

E schweere Chopf vom Ummesuffe, müedi Füess vom Danze,
Vom Uswärtsässe Maagebrenne und e volle Ranze,
all das hets in letschter Zyt leider nümme geh.
S git au guets: I ha bald es Johr keini Zunzger gseh.

Buckter Fröschebei

Mir hei an dr Fasnacht nie e Larve gha,
Das chunnt nid immer überall guet a.

Doch mittlerwile weiss es jedes Chind,
D’Fröschebei erkennsch am brune Grind.
Leider findet d’Fasnacht hür nid statt,
Mir finde’s ganz und gar nid glatt.
S’erschti Mol das Johr, das chönne mir euch säge,
Würde dank Corona, au d’Fröschebei e Maske träge.

Billy the Kid isch e Gauner gsi im Wilde Weschte, er isch berüehmt gsi, isch eine vo de Beschte.
«The Kid» isch Englisch und heisst uf Dütsch «s’Chind».
So heisst er weg sim chindliche Grind.
Letscht Summer isch er uferstande,
so isch es in dr Zitig gstande
Dank euser Super-Polizei, chunnt das Chind nit wit,
wos im Volg mit Falschgäld zahlt, nähme si’s grad mit.

D Landstryycher

Grad so «jo» und doch fascht «nei» hets Volk entschiide.
Drumm gits neui Flieger, s Viola die isch zfriide.
Die Lingge schimpfe, d Flieger dien z vill choschte.
Villicht chönnt mä sä jo mit Fasnachtsgäld im Volg go poschte.

Mir träge Larve an dr Fasnacht das isch Pflicht
E Maske drunter, denn das hilft … villicht
D Martullo Blocher, chönnt sich es Bispiil an eus neh
Denn würdä mir dä hässig Grind nid s ganz Joor gseh

Plaudertäsche, Läufelfinge

Was het sich d SBB ächt dänkt?
Het eifach der Zugvercheer iigschränkt.
Ohni Info stohsch am Gleis
Jetz macht d Sandra im Landroot Mais!
Als fuuli Usreed isch d Antwort cho:
Der Lokfüehrer heig Vaterschafts-Urlaub gno.
Eus Plaudertäsche gits immer no.
Mit links hei mir das Jöhrli gno.

Sit 50 Johr hei mir Fraue jo d Hose a,
doch erklär du das emol eme Maa.
No immer schielt er fasziniert,
wenn eini im Minirock durespaziert.

Eusi Gmein isch schampar gitzig,
Für Kultur gits wenig Understützig.
Im Bouloch dört bim Kohler unde
Hei si es paar alti Münze gfunde.
Jetz weiss me: Sit em Mittelalter
befähle do halt d Rappespalter.

Dr Whots und der Äpp

Corona sorgt gar für Nachwuchs bei den Schnitzelbänklern. Weil es keine Verse zu hören gab, haben Dr Whots und dr Äpp kurzerhand eigene gedichtet. Hier ein Auszug aus dem ersten Zettel der Karriere:

Jede Morge do mues ich unumwunde
so cirka am sächsi immer go pfunde.
Das wär jo no guet und nit übertriebe
s Problem isch nur – y verwach erscht um siibe.

Zää Dääg in Quarantääne und das dehaim
drzue no Homeoffice – äs isch gemain
in dere Zyt – y ha mine Auge nit traut
– häns mir ussem Auto d WC-Rolle klaut.

Amerika isch total gspallte,
die weele au immer e Breesidänt e Alte.
Die wäi nüt anders, dasch deene hailig,
denn s Wysse Huus het e Geriatrieabteilig.

Alfred von Eptingen

Zweuäzwänzig tuusig Stutz
für äs Papier mit wenig Nutz‘.
Leggät doch für dä schön Betrag.
Äs Hüffäli Spielgäld scho parat.
Mit der Bemerkig, dasch kei Witz.
Das syygä neui «PAPER COIN BITS».