In 40 Joor

«Die Gschicht verzell ich mol myne Chind», säit der Bueb mit de roote Löckli am Tischli näbedra zu sym Mami, «und wenn i keini Chind ha, denn verzell i se halt myne Grooss-Chind.»

Und ich sitz vor mym Cappuccino, muess chly schmunzlen und frog mi, was ich ächt myne Grooss-Chind mol so verzell.

«I mein, das müeset dir euch mol vorstelle, früehner, wo mir no jung gsi sy, do isch me no ohni Maske Zug gfahre», säg i denn velicht in 40 Joor, während d Grooss-Chind um d Plexiglas-Box umehöckle, woni drin sitz. «Ohni Maske Zug fahren isch sällmol no ganz normal gsi. Au zu de Stoosszyte, wenn d Züg us allne Nöt platzt sy.

Was Stoosszyte sy? Kennet dir halt au nümm, gäll. Aso Stoosszyte het me zum Byspiil so am Füürobe gha, wenn halt alli glychzytig häi sy. Ich mein, dört häi no die wenigschten im Homeoffice gschafft. Das häi mir gar nonig so kennt. Das isch denn erscht im 2020 so richtig ufchoo. Und es isch eben au im 2020 gsi, wo die Maskepflicht ändgültig doo gsi isch. Das isch schon es Züüg gsi, säg i euch. Mir häi zerscht müese lehre, wie me die Masken us däm Maske-Päckli usezupft, ohni ass si dervospickt und ohni ass me derby alli andere Masken in däm Päckli aafingerlet.

Und wie mir die Masken am Aafang teilwys montiert häi. Abentürligi Maske-Träg-Forme sy der do begegnet. Bim einte het d Naasen usegluegt, bin eren anderen isch ei Ohr abdeckt gsi. Do hesch alles gseh.

Aber au anderi Sache sy plötzlig komplizierter worden in sällem Joor. Zum Byspiil s Begrüesse. Do häi mir komplett müesen umdänke.

Wüsset dir eigetlig, wie me sich früehner begrüesst het? Nid? Aso looset zue: Mir häi eus gegesytig no die rächti Hand gee, und denn het me die Händ gschüttlet, und je feschter me derby zuedrückt het, deschto besser isch es gsi. Mängisch het me sogar no während em Schüttle die linggi Hand um die rächti Hand vom Gegenüber ummegleit. Und dört het sich denn imfall no fascht niemer d Händ desinfiziert. Das chönnet dir euch halt alles nümm vorstelle, gäll?

Derby isch Händ schüttle no s harmlosischte gsi. Gwüssi het me zur Begrüessig umarmt und mängisch het me sich sogar Küssli gee. Aber nid nummen äis, nei grad drüü Schmützli het me sich gee. Gspunne, oder? Das chasch fascht nid glaube, wenn das hüttigsdags überleisch.

Jojo, i sägs euch, s 2020 het vill über e Huffe gworfe. Chönnet euch denn freue, wenn der das Joor in der Schuel müeset dureneh.»

Der Cappuccino isch mittlerwyyle leer, und der Bueb mit de roote Löckli isch mit sym Mami dervoozottlet. Me darf gspannt sy, was men in 40 Joor de Grooss-Chind mol so für Gschichte vom 2020 verzellt. Vor allem, wil mir jo jetz erscht in der Helfti stecke vo däm gschichtsträchtige Joor.

Dominik Muheim ist in Reigoldswil aufgewachsen und lebt in Liestal. Er ist freischaffender Kabarettist und Slam-Poet. Er ist Poetry-Slam-Schweizer-Meister 2017 und gewann im selben Jahr den Baselbieter Kulturpreis.