IKS

Hützudags muess alles guet organisiert und dokumentiert wärde. Me säit däm Qualiteetssicherig und Risikomänätschmänt. Nid ass öbbis schieflauft oder vergässe goht. Au in eusem Zwöipersonehuushalt hilft das, alles im Griff z bhalte. Zwar gits do derfür gscheiti PC-Programm, wo men alles fyn süüferli notiert und au in hundert Johr no cha noocheläse, wie me syschtematisch der Poschtyygang muess sortiere, ass nüt undergoht – au wenns in hundert Johr kei Poscht me git. Mir sy noni so wyt. Bi eus holt my Frau d Poscht us em Briefchaschten und macht denn verschiideni Bygeli: 1. interessiert alli; 2. interessiert der Finanzchef; 3. interessiert die modebewussti Huusfrau; 4. interessiert der Choch; 5. interessiert niem würkli; 6. Altpapyr diräkt. Wenn i denn heichumm, nimm i die Bygeli, legg sen ufenand und lueg se dure, öb öbbis für mi derby isch.

Au d Koordination vo de Termin wird immer aaspruchsvoller. Wär chunnt wenn z Bsuech, wär chauft y, wär chocht, wär ruumt uf, und was gits überhaupt? Alles Sache, wo men umbedingt muess dokumentiere, ass me nochhär weiss, wär was vegässe het. Ohni HSG-Studium cha men in der hüttige Zyt chuum me e Huushalt füere. Wil my Frau und i aber nid z St. Galle studiert häi, isch euse Huushalt leider noni ISO-zertifiziert. I ha zwar aagfange, myni Termin und anderi Ufgööbeli im Natel yzdräge, aber leider hani s Natel nid immer derby und my Frau weiss au nid, was in mym Natel ydräit isch. D Sünchronisation mit ihrem Handy isch immer no in der Versuechsfase. My Frau het drum ihres eigene, syt Johrzähnten erprobten IKS (uf Dütsch: Internes Kontrollsystem), und das heisst «Chuchichäschtli».

S isch klar, ass das Syschteem nid an der Uni erfunde worden isch, sondern vonere Huuswirtschaftslehrere. Es handled sich um e groossformatige Kaländer, ca. 1 Kilo schwer, wo jedes Johr usechunnt mit gsunde Rezäpt für jede Daag, nützlige Tipps «Wie verwende ich Rüeblischellede sinnvoll?», «Wie verwöhne ich meinen Mann?», und ganz e Huffe Blatz für Notize. Dört dry schrybt my Frau alles, wo für en übersichtligi Huushalts- und Läbensfüerig nötig isch. Zerscht emol alli Termin vom Winterreifewächsel bis zum Pflanzdatum für d Hortänsie. Denn stoht au drin, was neggscht und überneggschti Wuche z erledigen isch und was men Änds Johr uf s neggschte muess überdräge. Dä Kaländer het si immer derby und drum bruucht si au en entsprächend groossi Handtäsche – wien e Mänätscher sys Akteköfferli. Dä Kaländer het e wytere groosse Vorteil: My Frau cha drin ihri Notize läsen ohni Läsebrülle, im Gegesatz zum Handy.

Trotz däm höchentwickleden IKS chas immer wiider Panne gee. S Chuchichäschtli cha im Gegesatz zum PC zwar nid abstürzen und funktioniert au bi Stromuusfall, und trotzdäm chas bassiere, ass s Bier usgoht oder d Milch suur wird. Das lyt meischtens do dra, ass ich vergiss e Notiz z mache, wenn i s letschte Bier drink oder d Milchgugge näbem Chüelschrank lo lo stoh. I hätt halt doch selle Betriibswirtschaft studiere.

Michi Kunz lebt in Zunzgen und schreibt regelmässig für die «Volksstimme».