Lang, lang hesch dir z Härze gnoo,
ass de nid söllsch uusegoo,
oder höchstens go spaziere,
aber nid im Dorf flaniere!

D Seniore – Dütsch: die Alte –
häi sich au rächt guet draa ghalte.
Doch au sii gsehsch glyych efange
uf d Lockerig vom Lockdown blange.

Jetz sy d Schuele wider offe.
Und au öisi Bäizer hoffe,
ass men äntlig unschiniert
wider usswärts konsumiert.

Wenn mir bim Konsumiere syy,
fallt mir au no öbbis yy:
Nach däm Lockdown hani zwee
volli Seck mit Leerguet gseh.

Doo isch öbbis zämechoo!
I pack die Seck und will se doo,
wo me Glas entsorge chaa,
go deponiere – lueg au aa:

S isch sofort offesichtlich gsii,
ass i nid der Äinzig bii,
wo all daas entsorge wett,
wo sich halt aagsammlet het.

Und s isch klar, ass dooderbyy
nid numme Joghurt-Gleesli syy …

Äigebröödler