Das Hutzgüri geht morgen Abend um

Am Frytig, em 21. Hornig duen ich, s Hutzgüri, zämme mit em Schärmuuser, em Bott und myne beede Äierwybli zum nünezwänzigschte Mool in der jüngere Gschicht vo Rotheflue e paar Wyybervölcher und Bürschtli im Dorf under der Rote Flue mi Uffwartig mache.

Öbben um die siibeni falle mir vom Weschte häär ins Dorf yy und marschiere schnuerstracks ufe Dorfplatz zue. Dört wäi mer emol luege, wär vo dene Rotheflüeher, wo nit bsuecht wärde, der Muet het, em Güri under d Auge z drätte.

Als erschts bsueche mer der Müller Willy im Bangsionierteviertel vo Rotheflueh. Mir wäi ihn grad emol frooge, wo är in Zuekunft ame si Ölfischluck goht go haa. S Gschlössli, won er süscht ame no aazdräffe isch, het jo all zue am Morge. S äint oder andere Grücht us däm Viertel isch öis im Oberloch z Ohre choo.

As nögschts bsueche mer der Bürgin Albert. Mir wäi öise abträtend gemäin Root frooge, öb er ächt mit sinere Fäldregulierig scho duuren isch, as er scho noloot. Öis weers aso scho no wichtig, as s Under- und Oberloch im Bsitz vom Güri blybe.

Der nögscht König, wo mer bsueche, isch der Brutschin Jonathan. Är isch in ganz eren andere Sparte tätig, er isch nämli Sänger. Är wohnt allwä nit ohni Grund grad näbem Trafohüüsli; mit syne Freakings macht er Muusig, wo vill Stroom bruucht. Äis isch sicher: S Hutzgüri will dä «Träschmetel», oder wie das Gschrei heisst, au emol ghööre. Wyter gohts zum Oliver Weber. Erstuunt isch s Hutzgüri, as är noni uf der Gmäinirootslischden isch. In dere Hütte, won är wohnt, isch das äigentlich Standard. As schwyzwyt äinzige Dog-Coach (Hundetrainer) goot ihm d Arbet sicher nit uus, eso vill Vierbäiner, wie efang ums Oberloch ume striehle.

S nögschte verspiilte Bürschtli, wo mer d Ufwartig mache, isch der Pascal Jenni alias Sagibueb. Sehr erfreut sy mer drüber, as är immer sorgfältig sini Pneu am Auti duet abdecke ufs Dennlers Platz. Do häi mer äinisch es Suure im Ohr gha, hei dänkt, es syg ä Bräämeschwarm. Aber näi, denn häi mer ä färngstürte Chaare gsee fahre ufem roote Platz. Het är ächt do s Stüürgrät in der Hand gha?

Die nögschti uf der Lyschte isch d Sarah Gysin. Am andere Ändi vo der Bracherstrooss sy s Gysins früsch dehäi. Si sy vom Schatteloch an Sunnehüübel züüglet – immerhin uf halbi Blickhööchi vo Wäislige. Dört wird denn allwäg d Byyse au e chly meh lufte, eso as si sich e chly wie dehäi fühlt.

Bevor mer zum nögschte Sürmel gönge, müese mer am unübersichtlichen Egge chly ufbasse, dass mer nit vomene 40 Tönner mit Jägerhaag-Deko uf der Idealspuur überhoblet wärde. Das syg jo dört obe neuerdings zu allne Daages- und Nachtzyte möglich.

Nochär gohts zum Strub Marc. Schön deckt isch der Balkon fürs Güri sit 10 Joor. Liebe Marc, wiso ums himmelsgottswille hesch denn du dä Balkon eso lo verfuule? Sitem letschte Turnerobe weiss mä jo jetz, dass der Marc der bescht Aff isch vom ganze TV. D Äierwyybli hätte ganz bsunders Fröid anere Vorfüehrig.

Nume zwöi Hüüser wyter hinde müese mer Obacht ha. S «Truckerbabe» Patricia Flück häig ä Schnure, wo allwä grad eso gross isch wie ihre Chaare – wird ämel im Gschlössli verzellt. Dr Laschtwaage söll si denn aber bim Dröschschopf unde lo stoo, süscht hets Güri mit sym Gfolg jo kä Platz meh in däm Stumpewäg.

Der letscht, wo mer d Ufwartig mache, isch der Graf Roger. Sit mir s letscht Mol bynem uf Bsuech gsi sy, hets jo in Neurotheflueh none paar Hüüser meh gee. Mir wäi emol go luege, öb die Alarmalaag jetzt goot oder öb mir emänd no e paar Schelme müese verschüüche. Bim underschte Wyybuur im Dorf würd s Hutzgüri gärn emol e Schluck brobiere.

So, das weere also die Frauen und Manne, wo mir d Ufwartig mache. In der Zwüschezyt sött sich ume gsproche ha, as me denn joo nit mit leere Händ sött do stoo, wenn s Hutzgüri chunt. Mit edle rote Säft, Brenntem und Gräuktem loot sich s Güri am schnällschte lo besänftige.

Und dir wüsset jo: Öbs huudlet oder Chatze haaglet – s Hutzgüri blybt immer voruss. Übrigens: Wär die ganzi Wohrheit wött wüsse, chunnt am beschte verby cho loose, was der Bott süscht non eso z verzelle het. Also denn, bis am 21. Hornig, zobe churz nach de siibeni.
Hutzgüri & Co