Fürs Neujoor 2020

Syget grüesst dir liebe Lüt
dir wüsset jo, bald isch’s so wyt
äs wyter’s Jöörli goot glyy z’Änd
und mir häi’s sälber in dä Händ
öb’s do no vill so Jöörli git
oder ebe villicht nit

E Mänge het gar vill um d’Oore
und isch die ganzi Zyt am Trampe
är het sich in sym Schtress verlore
und gseht se nit, die roti Lampe
är isch verschtrickt in so vill Sache
und het käi Zyt zum Pause mache
secklet im Gäld noch, wie die mäischte
dass är sich joo au alls cha läischte
isch voll am Ballascht noche schläike
– und plötzlich duet denn d Pumpi schträike

und im Schpital säit men ihm denne
gege Schtress sell är sich wehre
und dass är sich sell Pause gönne
und s Pause mache jetz müess lehre

das het nit nur mit Junge z tue
au Räntner ghöre do derzue

drum nämet euch doch alli vor
anderscht z’läbe ab Neujoor
ässet gsünder, blybet fit
damit’s no villi Jöörli git

und machet euch, wenn’s immer goot
euches Läbe nit so schwer
und läbet äifach jede Tag
als wenn’s für euch der letschti wer

so läbe, das find ich gerisse
nur süessi Täg und käini suure
und chunnt denn s Änd, wirdsch nüt vermisse
und muesch au nütem nochetruure

Peter Stolz, Gelterkinden