Uf däm Tobler-Areal
wird gar nüt bout, daas isch fatal.
D Helvetia hets kauft und welle
Wohnige dört aanestelle.
Denn isch vom Dänkmoolschutz äin choo …
jetzt blybt dä «Joker» halt no stoh.

Marti, Bösiger – grad zwee
häi ihre Gmäinroots-Rücktritt gee.
Und s trätte – doo stuunsch grad e bitz –
drei Frauen aa für die zwee Sitz.
Iich bi gspannt, wies goht im Root,
wenns vier zu drüü für d Fraue stoht.

Z Zunzge chasch bim Zimmermaa
s Fläisch jetz im Self Service haa.
D Frau Pfister findet daas nit schlächt,
der «Lady Tierschutz» chunnts grad rächt.
Jetz cha sy drum inkognito
es Entrecôte go uuseloo.

S nöi Parkreschyym git zimmlig z reede.
Es checkts am Aafang nooni jeede.
Und wenn sys checke, wyycht – oh Gruus –
alls in die wysse Zoonen uus.
Rund um d Sek maches au d Lehrer,
drum weers dört ohni Lehrer leerer.

Z Gälterchinde müess me spaare.
Em Gmäinroot wird an Chaare gfahre.
D Frau Mangold nützt die Gläägehäit,
het Näi zum Schuelhuus-Nöibou gsäit.
Es wärd jetz nümm grooss inveschtiert.
S Hallebaad isch jo saniert.

Mängisch will äin vill z hööch uuse
und stürzt denn ab, es isch zum Gruuse.
Daas hesch bi der BLKB
s letscht Joor düttlig chönne gseh.
Y wäiss nid, öb er daas verträit,
wenn äin em John jetz Hansi säit.

D Nazare chasch immer meh
au usserhalb vom Service gseh.
Sii häigi drum bim Battli unde
e Chläider Secondhandshop gfunde.
Es laufi dört – miir findes gspunne –
fascht no meh als in der «Sunne».

Äigebröödler