S Hutzgüri goht am 6. Meerz um

Wie allewyl het dr Veehdokter bim Znüni e chläi in dr «Volksstimme» bletteret. Ufsmool het er ufgluegt und zu den andere gsäit: « Looset emol, was doo stoht: D Bürgergmäin will d Hüüser vo dr Wyyhandlig Buess chaufe. S gääli Hauptgebäude mit dr Halle hindedraa und em Chäller drunder. Au no s blaui Huus dernäbe. S Hutzgüri, wo no im Halbschloof gsii isch und mit äim Ohr zuegloost het, isch schlagartig wach gsii. Wo s denn het afo ummenäschte und grad wellen ufstoh, sy d Äierwybli gschwind zuenem go luege, was au loos isch. S Hutzgüri het ihne jetz z verstoh gee, das syg grad Gläägeheit für ihns, ins Dorf z züügle. Do ligge sicher no e Huffe Fläschen umme, won äs chönnti sürpfle. Zuedäm hätt d’Bürgergmäin so au scho grad e Nutze für dä Chäller. Do het dr Veehdokter aber abgwunke. Das chönn er nit verantworte. Zum Äine weer all dä Schimmel in däm Chäller nit guet für im Hutzgüri si Lunge, und zum Andere all dä Wyy nit guet für si Läbere. Die Züüglete chönn sich s Hutzgüri grad us em Chopf schloo. D Äierwybli selle jetz e Baldriantee mache und luege, dass es wider chön yyschloofe.

Was dr Veehdokter aber no vill stutziger gmacht het bim Läse vo däm Bricht, isch s Datum vo deeren usserordentliche Bürgergmäinsversammlig, wo dä Chauf sell bschlosse wärde: Dunnschtig, 6. März 2025, zmitts in de Feerie und gnau an däm Tag, wo sii mit em Hutzgüri ins Dorf wäi go häische, sodass sy wider für es Joor gnueg Vorrööt häi. Also chönne sy by käim Bürger verbyy, will jo alli an deere Versammlig sy. Jetz isch d Diskussion loosgange. Was mache mir doo? Müesse mir öise Tag verschiebe, oder gönge mir erscht spoot in dr Nacht, wenn alli Bürger wider dehäi sy? Alli häi durenander gschwätzt, bis äin d Idee ghaa het, nä, mir maches doch anderscht. Wenn scho alli an deere Versammlig sy, gönge mir doch die dört mitenander go bsueche. Vo jedem Äinzelne erwarte mir aber nit grad e Goob, es längt, wenn d Bürgerrööt es paar rächti Fläsche vüremache und non e feine Salami oder e chüschtige Chees und e Schniifel Brot derzuelegge. Denn schlussemänd müesse d Äierwybli au alles no möge träge. So häi sys denn bschlosse und no die wyter Route feschtgläit, natürlig alles mit nit Sissecher Bürgerinne und Bürger. Bsuecht wärde:
• Alli Bürger vor dr Versammlig bi dr Wyyhandlig Buess
• Edith Zettel, Spaziergängere, Turnere, us em Oschte ins Zentrum züüglet
• Karli Mangold, Traktoremech, Klarinettischt, ehemalige Fasnächtler und Hockeyspieler
• Christoph Zumbrunn, Füürwehrmaa, Dunschtigoobe – Nachtbiker
• Willi Schwander, Turner, Wanderer, Hälfer, wos z hälfe git
• Simone und Hansjakob Speich, Grosseltere, Curler, OL-Läufer, alles immer mit em Jurischteblick
• Raphi Zaugg, Füürwehrhäuptling, zuegwanderet us dr Republik
• Vreni Ditzler, Grossmuetter, Frytigs-Bäize-Jassere,
• Roberto D’Agostini, Grafiker, Spruchrife Mundartgitarrischt.

Dass s Hützgüri d Bürgergmäinsversammlig nit stört, wirds hüür e chläi früehner aagschiiret. Vermuetlich wird das Unghüür no in dr Dämmerig uftauche. Drum um so meh, gäbet acht!

Dr Schärmuuser