S Hutzgüri goht am 19. Hornig um

No käis Johr isch umme und d Vorroots-Chammere sy scho wider leer. Mit lange Gsichter häi d Äierwybli enand aagluegt. Jetz isch me doch letscht Johr äxtra zu de Bürger go häische, in dr Hoffnig, es längi guet über s Johr. Item, wohrschynlig hets s Hutzgüri äifach meh bruucht as anderi Johr. Dasch guet möglig. Denn es isch immer ufgjuckt, wenn im Rahme vom 800-Johr-Jubiläum im Dorf wieder öppis loos gsii isch. Und das isch jo so äiniges gsii. S het grossi, chlyyni, sogar Mega-Aaläss geh. Ganz bunti, aber au ganz farblosi.

D Äierwybli häi jedes Mool e häide Müeh gha, s Hutzgüri wider in Schloof z singe. Mit ere Fläsche Roote und öbbis Feinem us dr Vorroots-Chammere ischs ame doch glunge. Dr Veehdokter het aber doch au meh as äinisch müessen ygriffe und ihns no mit ere äxtra Sprütze beruhige. Das Johr wird hoffentlig e chläi äifacher. S wird jo nümm gar so vill loos sy und s Hutzgüri cha denn hoffentlig e chläi ruhiger schloofe.

As es aber au so richtig in Tiefschloof cha sinke, wäi mirs no zerscht müed mache. Für daas chöme mir am Dunnschtig, 19. Hornig, mit ihm ins Dorf. Das Mool wäi mir im nordöschtlige Täil vom Dorf öisi War zämeramisiere. Bi deene Lüt macht s Hützgüri Halt:
• Jeanette Weisskopf, diplomierti Chinderhüetere, Mittagstisch-Chöchi, ab und zue Fasnächtlere, Frohnatur
• Barbara und Martin Koch, 1. Stimm vo Radio Raurach, 1.Tryyber by de Sissecher Jeeger
• Andreas Riesen, Fasnachtsmitorganisator, Boufachmaa
• Lea Simeon, Lehrerin für spezielli Fäll, zuegwanderet us em Stäibockland
• Angelo Tomaselli, Architekt, Häimetschützer, Wälterklärer, au zuegwanderet
• Steff Müller, Lehrer im Ruehestand, professionelle Hobby-Gitarischt, Groovepack
• Thomas Mohler, Handballer, Wältebummler, zrugg us em Zunzger Exil, wider in dr Häimet
• Thomas Kunz, falsche Flitzer, Zwillingsbrueder, Profijasser, sässhaft gwordene Nomad, Stöpplistammgascht
• Luki Abt, Lindbi-Bäizer, Profi-Cocktail-Mixer, Überläufer vo Gälterchinde Nachdäm s Hutzgüri jetz sicher scho meh as e Moonet uf em Trochenen isch, wüsse mir nit, was am 19. Hornig alles wird passiere. Drum um so meh, gäbet acht! Häit gnueg Material parat, wo d Äierwybli chönne in ihre Hutte in d Höhli schläike. Dr Bott luegt, as mir uf em rächte Wäg blyybe. Dr Veehdokter isch parat, im Fall as dr Schärmuuser s Hutzgüri nümm cha unter Kontrolle bhalte. Settis wider Erwarte zume usserordentlige Usbruch cho, chönnet dir s Hutzgüri mit entsprechändem Fuetter in flüssiger und feschter Form besänftige. Dr Veehdokter wäiss, was und wie vill em guet duet. Hoffetlig gohts ohni grössere Land- und Flurschaade verbyy.

Dr Schärmuuser