Schwafelbiet | Buus bis Buckte, gigantischi Gälterchinder Gmäinis, Zunzger zyylt z’Bärg – e Hampfle Värs

Buckte

Der Riebli macht sich am e Morge
um syni politisch Gsundhäit Sorge.
«Mi macht», säit är, scho im Spital,
«die Radicant ganz radikal.»

Buus

Gigantisch grosse Waggiswääge
verweig’ret Sissech nöi dr Sääge.
De Gugge-Rugger platzt der Chraage,
sy chömme mit eme Läiterwaage.
Statt Pauke flötet me mit Harfe –
und träit us Trotz s erscht Mool e Larve.

Sissech

Es isch nümm lyycht, in Sissech z wohne
mit dene ville Parkplatz-Zoone.
Was? Blau isch wyss? Näi, wyss isch blau.
Käine wäiss das so genau.
Au d Lehrer – die häi doch studiert –
häi s nöi Süschtem nid ganz kapiert
und stelle d Göppel churzerhand
im nöchschte Dorf an Stroosserand.
Ämel grad so lang, bigoscht,
bis es dört au öbbis choscht.

Tschudy-Villa

Der Gurli-Chef wünscht e paar Zyyle
zur Villa Tschudy: «Fang aa fyyle.»
Der Neofütt gryfft sich in d Hoor:
«Nimm doch dä vom letschte Johr.»

Chluuri

Z Sissech isch s e bsundri Ehr,
z stärbe in däm Flammemeer.
Jetzt syg dä Aalass in däm Johr
unerwartet no in Gfohr.
S letscht Mol isch der Hockeygott
gstorben uf em Füür-Schafott.
Em Schläpfer isch – und d Zyt, die rennt –
sy Schnuure nonig aabebrennt.

801 Johr, 1

S Jubileeum macht jetzt Schluss.
Vill Schöns het s brocht und au Verdruss.
Am beschte doo hät euse Närve,
dä Kräisel glyy ins Sperrguet z wärfe.

801 Johr, 2

Vo toll bis pyynlich, der Tenor
zum grosse Jubiläumsjohr.
Der Gmäinroot säit an synre Sitzig,
är fänd d Kritik an ihm nid witzig.
«Mir hätten öppis überläit,
hät men öis das früener gsäit.»
Der Buuser Peter mäint (verhalte):
«Wenn mir s Tuusger-Jubileeum gstalte,
denn wird y, näbe andre Sache,
das Fescht sofort zur Chefsach mache.
Bis denne stoot – das bring y zwääg –
au spötischtens dr Themewääg.»

Buus

Cheersch im «Stab» zum Ässen yy,
denn bstellsch dir roote Buusner Wyy.
Zum Ässen aber – würd y roote:
Nimm der gspickti Ratte-Broote.

Diekte, Nusshohl, Üttige

Der Ruedi Ritter will sy Rueh,
nach 14 Johr het är jetz gnue.
Zerscht het der Wirz demissioniert,
und will dä Job käin int’ressiert,
stygt är halt nomoll in d Hoose.
Aber jetz chönn men ihm bloose.
Em Mundi z Üttige sölls stinke.
Nach 19 Johr chlopft är jetz d Finke.
Drei Gmäinimuni-Dino mache
Platz für nöii Chöpf und Sache.
Wenn mir die Amtsjohr jetz addiere,
denn git das, ohni gross z studiere,
kumuliert jo guet und gärn
der Maya ihri Amtsjohr z Bärn.
Bi ihre hesch, was äim verstört,
no immer nüt vom Hööre ghört.

Gälti

Der Maa chunnt häi, duss daagts efang,
und d Frau, die nimmt en in Empfang
und läit grad loos mit ihrem Toobe:
E Frauegschicht? E Herrenoobe?
Ziehsch du öppe mit em Baschi
znacht im Dorf e Bolle Hasch yy?
«Y bi nid bsoffe, au nid rammlig,
y chumm grad vo der Gmäinsversammlig.»

801 Johr, 3

Der Themewääg wird doch no bout.
Mir hätte das nid d z träume drout.
Benutzerfründlich, schlicht und – logisch –
au abgspäckt schampar pädagogisch.
Lang überläit me hin und här,
was me presentiert und wär.
Wirtschaftsgschicht, Chrieg, d Flueh, Persone,
wo sich z porträtiere lohne.
Schliesslig chönnt, so fallt mir yy,
der Themewääg es Thema syy.

Sissech

D Chefin vo dr Sunne schrybt uf,
wär morn wenn was und wo drybt:
Parkplatz wüsche, Wyy in Chäller?
Das macht my Maa, das cha käin gschnäller.
My Maa suecht d Chöch und deckt au d Tisch,
wenn är mit Suuge fertig isch.
Glette, bette, Portier z Nacht?
All das wird vom Michele gmacht.
Wär putzt, zapft Bier und mischt Salat aa?
Das macht dernoo der …

Yysi, 1

Der Bundesroot schiesst s Härzprojäkt
vom Räber furt – und zwar diräkt.
«Schaad», säit dä, «denn tröscht y
my mit ere feine Röschti.»

Yysi, 2

Zum Räber säit der Toni Lauber,
die Radicant syg super, glaub er.
Aber s Budget und d Bilanze
schlöien ihm mänggisch uf e Ranze.
Will, ehrlig, häig är s nid ganz duss:
Wo chunnt s Minus? Wo chunnt s Plus?

Yysi, 3

Und wenn mir scho derbyy sy:
S froggt s Moni Gschwind dr Yysi:
«Mäinsch, d Sabine Buecher hätti jetzt
mii in Lieschtel guet ersetzt?»
«Zum Zwyyfle gits», säit är, «käi Grund,
au wenn die au vo Sissech chunnt.»

Gälti

E Klimaschuel isch immer prima,
mänggisch aber räizt sy s Klima.

Wintersinge

Im Laufedaal würd Wintersinge
im Ryym mit Nusshof zämefinge.
Doo muesch se anders zämebringe,
denn läider lyt das nid dört hinge.

Zekirü

Drei Dörfer uf em Platoo oobe
wäi sich «ewigi Liebi» gloobe.
Me froggt sich, öb in d Dreierchischte
sich e Vierte yy söll nischte.
Doch häisst s denn, me verzichti jetze,
Gälti Grönland-meessig z bsetze.
Rünebärg säit zu syne Fründe,
me chönn e äigni Uni gründe.

Denn merke sy, s muess, nundefahne,
zerscht e nöie Namen aane.
Me säit däm wüeschte «Rükize»
äis für alli Mool adé.
«Wiisebärg» lyt uf em Tisch,
obwohl doo alles eeben isch.
Zuedäm weer nach Gschyss und Gschrei
as Name nöi «Naturpark» frei.

Zunzge

Käine trifft uf Ärde, glaub,
no meh ins Schwarze as der Schaub.
Dä chönnt doch statt der Sportpischtole
d Kanone us em Chäller hole,
s Visier gschnäll uf e Büchel richte
und s gröscht Problem vom Dorf vernichte.

S Vroni

Die Gsprööch vom Mäder, säit sich s Vroni,
sii glaub chuum, dass sich das lohni.
KI, Trump und Menschehandel,
Syydestrooss und Kilmawandel,
Fairtrade, Rächtsextremi, Boni:
«Daas änderet doch nüt», säit s Vroni.

«Doch wenn mir d Nochbers-Chatz hüt znacht
grad äifach zmitzt in Garte macht,
und d Volchsstimm erscht am vieri chunnt,
denn gang däm, Mäder, uf e Grund.
Fürs Podium, lieben Ueli,
ston i parat, lüt aa»,
schrybt ihm doo s Vroni.